Ka Meghalaya Democratic Alliance (MDA-2 ) ha ka 3 tarik Jylliew ka la shim ia ka rai ban pynieng ia u James K. Sangma kum u kyrtong ia mon lang na ka bynta ka elekshon sha Rajya Sabha ka ban sa long ha ka 18 tarik Jylliew 2026.
Ia kane ka rai la pynbna hadien ka jingialang jong ka kynhun synrop kaba la long ha Shillong.
U Conrad u la pyntip ba u James K. Sangma yn thep ia ki kot ki sla ha ka 5 tarik Jylliew 2026.
Ha kane ka jingialang la wan ban iashim bynta da ki nongmihkhmat jong ki seng saiñ pyrthei bapher bapher kiba don bynta ha ka MDA -2 kynthup ia ka BJP ka UDP bad HSPDP bad kiwei kiwei ki dkhot jong ka kynhun synrop.
Katkum ka Resolution ba la shim ha kane ka jingialang, ki party bapher bapher hapoh ka MDA ki la pynpaw ba ki kwah ban pynieng la ki jong ki kyrtong. Hynrei namar ba ha kaba sdang ym shym la lah ban ia mynjur lang halor kawei ka kyrteng, ka kynhun ka la rai ban bud ia ka jingiateh ba la buh jong ka ban ailad ia ka seng kaba heh tam ban tyrwa kyrtong.
Hadien ka jingïamir jingmut kaba bniah, baroh ki paralok ka MDA ki la mynjur da kawei ka sur ban kyrshan ïa u James K. Sangma kum u kyrtong ba ïadei lang jong ka kynhun na ka bynta ka elekshon Rajya Sabha kaba la buh ban long ha ka 18 tarik u Jylliew, 2026.
U Conrad u la pynpaw ba hadien ba la ïoh ïa ka jingkyrshan jong ka MDA, u James K. Sangma um dei shuh tang u kyrtong jong ka National People’s Party (NPP), hynrei u la kylla long u kyrtong ba thikna jong ka kynhun synrop MDA baroh kawei.
Ha kane ka jingialang la iakren ruh halor ka elekshon shiteng samoi ban wan sha ka Shillong Parliamentary Constituency. Ka jingiateh lok ka la mynjur ban ailad ia kawei pa kawei ka seng kaba don bynta ban shim ia la ka jong ka rai ha kaba iadei bad ka elekshon shiteng samoi.
Haba pynkut ïa ka jingïalang, baroh ki dkhot kiba la don lang ki la pynpaw ïa ka jingkyrshan ba pura ïa kane ka rai bad ki la kyrpad ïa ki nongtrei bad ki nongkyrshan jong ka party ban ïatreilang ban pyntikna ïa ka jingjop jong u kyrtong ba la jied da ka MDA -2.
