Pynkup burom ka ophis DSEO WJHD ïa ki samla kiba poi shakhmat ha ka result SSLC bad HSSLC

Ka ophis jong ka District School Education Officer, West Jaintia Hills District, Jowai mynta ka sngi kala pynkup burom ïa ki samla kiba la pass bha shakhmat ha ka result SSLC bad ka HSSLC ba dang shu dep shen, ha District Library Auditorium, Mynthong, Jowai.

Ha kane ka sngi u Director of School Education and Literacy (DSEL), ka jylla u bah Banteilang J Kharshandi MCS, ula long u kongsan, ha ka jingïadon ryngkat ka District School Education Officer ka Dr. (Mrs) Wa-i-Sa Sumer, i Joint Director DSEL ba la shongthait i kong A.P. Syiem bad ki nongtrei na ka ophis DSO, ki Principal, ki nonghikai bad ki kmie ki kpa jong ki khynnah skul.

La ioh ban pynkup burom ïa ki 7 ngut ki samla kiba la poi sha ka thong ha ka SSLC Examination bad 2 ngut ha ka HSSLC Examination (Arts bad Science).

Ki samla kiba la shah pynkup burom ha ka SSLC ki kynthup ia Jenita Pator -5^th Position, Sawlyngdoh Higher Secondary School, Mowkaaiw, Weimaya Nongtdu Lakiang-8^th Position and Aaron Dhar-18^th Position baroh ar ngut na North Liberty Higher Secondary School, Jowai, Iakmenika Chullet -10^th position, Shangpung Presbyterian Higher Secondary School, Shangpung, S.Shekinah Marboh-12^th Position. St. Mary Mazzerello Girls Higher Secondary School, Jowai,  Ericfernando Papang -19^th Position, Shangpung RMSA Secondary School, Shangpung, bad Leadingstar Maria Lamin -19^th Position, na Jawaharlal Nehru Memorial Secondary School, Lamin  

Ha ka HSSLC pat ki kynthup ia ka Mewarica Pariat -10^th Position (HSSLC Arts) and Hakiru Challam-8^th Position (HSSLC Science) baroh ar na North Liberty Higher Secondary School, Jowai.

Na ka liang jong u Director of School Education and Literacy bah Banteilang J Kharshandi u la ai khublei kyrpang ia kitei ki samla kiba la poi sha kane ka thong. U la kyntu ïa ki ba kin nangtrei shitom shuh shuh bad ki dei ban jied ïa kaei kaba ki sngewtynnad bad ki lah ha ka jingim jong ki. U ong ba ka jinglah jong kine ki samla ka long ka burom ïa ka District bad kane ka long ka nuksa kaba bha ïa kiwei de ki samla.

Kiwei de kiba ai jingkren ha kane ka sngi ki kynthup ïa u bah Richard Uriah, Principal ka North Liberty Higher Seconday School, kumjuh na ka samla Jenita Pator.

La sam ïa ki Memento sha kitei ki samla bad kumjuh sha ki samla kiba ioh bun mark (Highest Marks) ha ki subject bapher bapher.