Mynta ka sngi ka Jaintia Coal Miner and Dealer Association (JCMDA) ka la pynlong ia ka jingialang ba kyrpang bad ki sengbhalang bapher bapher kiba don hapoh ka East Jaintia Hills District na ka bynta ban pynkhlaiñ shuh shuh ia ka jingiakhih kaba dang iaid mynta na ka bynta ban pynbor ia ka sorkar ban shah ban sdang ia ka jingtih dewiong lyngba ka Small Underground Scientific Coal Mining.
Ka Association ka pynpaw ka jingsngewnguh ia baroh ki sengbhalang (NGOs) jong ka District kiba la wan shakhmaat ban ai ka jingkyrshan ba pura na ka bynta kane ka mat jingiakhih kaba dei ka kam iap kam im jong ki nongshong shnong ka thaiñ. La pynpaw ba da ki hajar tylli ki longling ha East Jaintia Hills, khamtam kito kiba duk kiba im da kaba trei shi sngi bam shi sngi, ki la shah ktah jur bha namar ka jingkhang ia ka kam tih dewiong.
Ha kane ka jinglalang, ka Association ka la pynpaw ba ka la iohi lyngba ki ladpathai khubor ba ka sorkar ka la pyni katto katne ki sienjam bad kyntu ba kine kim dei tang ban shukor ia ki paidbah tang hashwa ka elekshon, hynrei ki dei ban long kiba thikna bad dei ban treikam hashwa ban kut ka jingbuhpor kaba lai bnai na ka Association.
“Ka Association ka la shem ruh ba don katto katne ki Association, kiba la sngap jar la bun snem, mynta bad ki la kyndit thiah tang hadien ba ki la iohi ia ka jingkyrshan kaba khraw da ki phew phew hajar ngut ki briew ha ka jingiaid paidbah ba la pynlong da ngi
ha ka 7 tarik laiong 2026. Ka paw ba ki kwah ban shim kabu ia kane ka jinglong jingman na ka bynta ki jingmyntoi shimet ne ki thong kiba rieh. Ngi kyntu ia baroh kine ki kynhun, ban iatrei lang bad ka Jaintia Coal Miner and Dealer Association da ka juh ka thong na ka bynta ka bha ka miat jong ki nongtih dewiong ki nongdie, bad ki nongtrei. Lada ngi iatylli ngi ieng skhem, lada ngi iapait ngi hap. To ngin ym pyntlot ia ka sur jong ngi kaba lang ha kane ka por kaba donkam” la kyntu ka JCMDA.
Ha ka juh ka por ka Association ka buh ka jingkyntu ba kumba la dep ban iakynduh ia u Deputy Chief Minister, ki heh DMR bad ka JHADC ba kin pynbna kloi ia ka polisi tih dewiong kaba rit (Small Undergroud Scientific Coal Mining) khnang ba kan weng noh ia ka jingeh bad jingshitom jong ki nongshong shnong ka thaiñ.
La pyntip ba ki kynhun bad ki sengbhalang bapher bapher kiba la poi sha katei ka jingialang ki kynthup ia ka JSM, KSU, MPUF, JSU, JNC, HYC, Hima Sutnga Youth Front (HSYF), HNYF, East Jaintia Hills Coal Minerals Supplier Association (EJHCSA), Synjuk Waheh Shnong, East Jaintia Hills (SWSEJH), Truck Owner and Supplier Association (TOSA) bad ka FKJGP.
