Ka jingshong shah tngan jong u President ka Jaintia Owner Miners Supplier & Workers Association (JCOMSWA) u ma Marshall S.B. Biam haba duh ba thoh ia ka khubor mynta ka sngi kala poi sha ka 115 kynta.
Ha ka jingleit jngoh jong u Yutip la iohi ba u ma Biam u la don hapdeng ka met kaba la tlot bha. Haba iakren bad u ma Marshal ula iathuh ba kumba long mynta ki ktaj ki kti kila sdang ban sohkhrai bad tyrsaiñ ki mat ki pung. Mynta wat tang ka um ruh um lah shuh ban nguid wat hapdeng ka jingryngkhiang jong u ryndang jong u. Kat ka jinglap jong u Yutip la shem ba u Marshall u la kem tlot bha bad wat tang ban shong ruh ha ka por ba iakren ruh um lah shuh, hynrei la katta ruh haba wan mih ki Doctor um shah ia ki ban ktah ne examin ia ka koit ka khiah jong u. U Marshall ula ong ba wat la u sngewtlot katne ruh hynrei “Ngan ym sangeh na kane ka jingshong shah thngan jong nga, tad haduh ban da ioh ktien na ka sorkar, ban shah ban tih dewiong kumba 12 snem mynshwa”.
Ha kane ka jingdawa jong ka JCOMSWA, ka la ioh ia ka jingkyrshan na baroh kiba don par dewiong jong ka ri lum Jaintia. Haduh mynta ka sngi la iohi ba ki don da ki spah spah ngut ki nongwan ai jingkyrshan kila wan mih sha ka jaka ba shong shah thngan u ma Marshall S.B. Biam, President ka JCOMSWA ban kyrshan ia ka jingdawa jong ka Association jong u.
Na ka daw jong ka jingbun jong ki paidbah ba wan jngoh ia u ma Marshall, na ka liang jong ki nongpyniaid kila buh ka jingkyrpad bad kyntu ia ki paidbah ban ym iatur eh shajan jong u, la kyntu ia ki paidbah ban kiar na ka jingdih duma khnang ba kan ym ktah ia ka koit ka khiah jong u Marshall bad kumjuh ruh ban kiar na ka jingbam kwai bad tympew ban lait na ka jingpynjakhlia ia kane ka jaka. Lada don kiba kwah ban dih duma ne bam kwai ki lah ban leh kham sha jngai na kane ka jaka shah thngan.
Katkum ka jingiathuh ki nongpyniaid la ong ba haduh mynta ym pat don kino kino ki nongmihkhmat paidbah MLA lane MDC kiba wan jngoh ia u Marshall Biam, wat la ka jingshah thngan jong u ka long kaba wan rah jingmyntoi ia ki paidbah ha ka ioh ka kot bad ka roi ka par jong ki nongshong shnong jong ka ri lum Jaintia.
