Kawei ka longkmie na East Jaiñtia Hills District ka la ïakren bad ki lad pathai khubor mynta ka sngi, ka la iathuh ia ki daw ba ka la kyrshan ia ka JCOMSWA, ka seng kaba dawa na ka sorkar ban plie biang ïa ki kam tih dewïong ha katei ka District.
Mynta ka sngi ka JCOMSWA ka la pynlong ia ka jingiaid paidbah na Ladrymbai Dongwah haduh ka ophis u Deputy Commissioner, East Jaintia Hills District.
Ka la ïathuh ha ki lad pathai khubor ba u President ka JCOMSWA u la shong shah thngan khlem buh por naduh ka 1 tarik u Jylliew na ka bynta kiba duk bad na ka bynta ki paidbah ka East Jaiñtia Hills District. Ka jingtih dewiong ka long ka lad kamai kaba kongsan hangne, bad ka jingkhang tih dewiong ka la ktah jur ia ki kam kamai. Ka la kyntu ïa ka Sorkar Meghalaya ba kan sngap ïa ka sur jong ki paidbah. Ka la bynrap ruh ba bun ki briew ki don ha ka jingeh bad don ruh kiba la ïoh ïa ka jingpang.
Na ka liang jong u President ka seng ki trai bad nongniah taksi na East Jaintia u bah Shining Siangshai u la ong ba ka seng jong u ka wan ban kyrshan ia ka jingdawa jong ka JCOMSWA ban sdang biang ia ka jingtih dewiong namar ba naduh ba la khang ia u dewiong, ki trai bad ki nongniah taksi ki la mad shibun ki jingeh. Kito kiba dang siew EMI ia ki kali jong ki, ki la shem shitom ban siew, bad ka jingsiew ia ki kot ki sla bad ki bai lutksan kiba iadei bad ki kali ka la long kaba eh bha. Ka ioh ka kot jong ka distrik ka la nang hiar, bad namar ka jingkyrduh pisa katto katne ki samla ki la sdang ban ngop ha ka tuh ka thiem. U la kyntu ia ka sorkar ba ka dei ban shim khia bha ia kane ka kam namar ka kam tih dewiong ka dei ka lad kamai kaba hakhmat eh ia ki briew ha East Jaintia Hills District.
