Ka Dorbar ki Waheh Kur Ri Jaiñtia ha ka 15 tarik u Jylliew kala ai jingthoh sha u Chief Executive Member (CEM) ka JHADC, Jowai u ma Thombor Shiwat ban pynkynmaw halor ka shithi DWK Ri Jaintia/ 2025 -27/ 11 tarik 01/06/2026, ka jingkyrpad ban thaw Aiñ ban buh ryntih (Codify), ban pynskhem, ban ïada bad pynbha ïa ka Jait ka Kur na ka Kmie (Bei ka tre wakha), kumba la aibor da ka 6 Schedule ka riti treikam ka Ri India ïa ka JHADC.
Ha katei ka shithi ka Dorbar ki Waheh Kur Ri Jaiñtia la kdew ba ka Dorbar kala dep pynlong ïa ka Dorbar paidbah naduh ki President, General Secretary, ki nongkitkam bad ki Waheh Kur jong ki Seng kur, kaba la long ha ka 13/06/2026 bad la pynpaw ïa ka jingsngewbynñiaw ïa ka jingsngap jar jar bad ka jingbym ñiewkor ka JHADC ban ai jubab ne khot ïa kren halor ka shithi jingkyrpad kaba kila dep phah sha ka Council na ka bynta ka jingïada, ka jingshngaiñ jong baroh ki jait ki kur kiba hiar pateng na ka Kmie, kiba don hapoh ka JHADC kumba la aibor da ka khyrnit kaba hynriew ka riti treikam ka Ri India.
Na ka liang ka Dorbar ka la kyrpad biang naduh ki EM bad ïa baroh ki MDC ka JHADC ba kin sngewbha ban ai jubab noh da ka jingthoh hapoh ka 30 tarik u bnai Jylliew, 2026 ïa kaei ka sien jam kaba ki la shim ban pyntreikam ban buh ryntih noh da ka aiñ halor kane ka phang, kaba hakhlieh tam na baroh ki jingthmu ka aiñ 6 schedule ïa ka jinglong kyrpang ka jait ka Kur na ka Kmie kumba la ithuh bad pynskhem da ka pyrthei.
La pynsngew ruh ba ka Dorbar ka don ka jingshañiah bad ka jingkyrmen ha u CEM uba long kum u nongïalam ka JHADC, ban pyntreikam noh kloi ïa kane ka jingkyrpad ka jong ka Dorbar hapoh katei ka tarik ba la buh. Namar la sngewthuh kum u Rangbah uba ïoh ïa ka Jait ka Kur na ka kmie bad ym ban ïohi ba ki Waheh Kur kin mih surok ban dawa ïa ka hok ïa kaba la don lypa ka aiñ kaba sah satang ha ki MDC ban buh ryntih bad pynskhem katkum ka aiñ, la pynkut ka kyrwoh bala phah da u ma Khroo L Pariat uba dei u President bad u ma GH Bareh u General Secretary.
ïa kane ka juh ka shithi la phah copy kumjuh sha ki 2 ngut ki symbud myntri jong ka sorkar jylla.