Ha ka Rally kaba la long hynne ka sngi 16/06/2026, ha Khliehriat, ka Nongbah jong ka East Jaintia Hills District, kaba la khot da ka Jaintia Coal Owner Miners & Supplier Workers Association (JCOMSWA) da ki hajar ngut kynthei bad shynrang ki la ia wan shimbynta ha kane ka Rally kaba dawa na ka Sorkar ba kan weng noh ia ka Aiñ khangtih Dewiong bad ban pynlait khlem da pynslem shuh ia ki paidbah kiba don par Dewiong ba kin tih, pyntrei bad die kumba long ha shwa ka snem 2014.
Ha shwa ban pynnlong ia ka jingiaid paidbah (Rally) la don ka jingiakynduh lang ha Madanbol Ladrymbai Dongwah ha ka jaka kaba u President jong ka JCOMSWA ma Marshal S.B. Biam u thiah shah thngan. Baroh ki Nongwan shim bynta ha ka Rally bad kiba wan jngoh sngewlem ia u ma Marshal Biam, uba don ha ka jingtlot ka met kaba jur ha ka jingshah thngan kaba la dap 16 sngi lynter, ki Nongwan sngewlem kim lah khlem da jaw um mat hi brup haba ki iohi ia u ma Marshal S.B. Biam, uba don ha ka jingtlot ka met kaba tang ban kren um lait kren shuh ba la tlot palat ka met.
Ka jingiaid rally ka sdang na Madan ialehkaibol Ladrymbai Dongwah da ki Kali bad na ka Shikilometer ki sdang ka jingiaid kjat da ka jingthmu ban tur sha ka Ophis jong u Deputy Commissioner, Mr. Manish Kumar, IAS bad ban pynpaw ha u ia ka jingdawa jong ka Association kaba ieng dawa na ka Sorkar ba kan pynlait ia ka jingkhangtih Dewiong bad ban ailad ia ki Nongshong shnong ka Rilum Jaintia kaba kynthup ia ka East bad West Jaintia Hills District. Ki paidbah nongiaid rally haba kim iohlad ban rung sha Compound jong ka Deputy Commissioner Ophis, la pynlong noh ia ka jingialang paidbah ha surok bah National High Way habar ka khyrdop (main Gate) jong ka ophis Deputy Commissioner, Khliehriat.
Ha kane ka jingialang paidbah la ioh nyngkong ia ka jingkren na u Waheh Nasar Pala na Myndihati, na u ma Shaniah Suchen bad kiba bun ki Nongkren la ioh na ki longkmie. Baroh ki Nongkren ki la pynpaw ba naduh ba khangtih Dewiong khyndaiphew san percent na ki nongshong shnong jong ka East Jaintia Hills, kiba im da kaba tih bad die dewiong ha ki snem kiba mynshwa kaba la kyntiew ia ki ba kin kiew ha ka ioh ka kot bad naduh ba khang ia ki Nongshong shnong ban tih ia u Dewiong uba don na ki jaka jong ki mynta ki la poi ha ka jingkutlad ha baroh ki liang, la ha ka Kha-ï ka Khaba, ha ka jingpynleit skul ia ki Khun ki Ksiew bad ha ka ioh ka kot. Baroh ki Nongkren ki la kyrpad ia ka Sorkar ba kan peit sngewsynei lem ia ka jingeh jong ki Nongshong shnong jong ka East Jaintia Hills bad ban pynlait khlem da pynslem shuh ia ka jingkhangtih Dewiong ba ki Trai jaka kiba don par Dewiong kin lah ban tih, ban die bad ai jingtrei ia ki hajar ngut ki nongbylla ia ki trai Muluk Trai jaka lane ia kiba nabar.
Ka Sur jong ki paidbah Nongiaid Rally ka sawa ba lada ka Sorkar kam pynlait mardor ia ka khang tih dewiong kim banse ban leh da kaba tyngeh da kaba mih paidbah bad Block ia u Surok National High Way, khlem da buhpor (indefinite road blockage) tat haduh ba ka sorkar kan weng ia ka Aiñ khang tih dewiong.
