U Secretary ka shnong Pamrakmai u bah Wellson Siangshai u la iathuh ha ki lad pathai khubor mynta ka sngi ba ka shnong ka la ujor da ka FIR hadien ba ki la shah tuh ia ki tiar pynpoi um jong ka Jal Jeevan Mission (JJM). U la ong ba ia ka skhim JJM la pyndep hynrei kam pat treikam satia ha katei ka shnong, kiba bun ki G.I pipe bad kiwei kiwei ki tiar ki la shah tuh.
Ka Dorbar Shnong ka Pamrakmai ka la ujor ia kane ka ejahar ha Ladrymbai police outpost bad ka la kyntu ia ki bor ba dei peit ban tohkit bad ban lap ia kiba donkti.
Ka Dorbar Shnong ka la pynpaw ka jingsngewkhia halor kitei ki jingjia. U ophisar ba dei peit ha ka Ladrymbai Police Outpost u la pynthikna ia ki ba yn sa shimkhia bha ia kane ka kam. Ka Dorbar Shnong ka la kyrpad ruh ia ki paidbah ban ioh jingtip, da kaba tyrwa ia ka khusnam ia kino kino kiba wan shakhmat. Kane ka jingshahtuh ka ktah ym tang ia ka shnong hynrei ia ka tnad PHE ruh.
Katba ym pat lah ban tip ia ka dor ba thikna jong ki tiar ba la tuh, hynrei bun na ki tiar kiba rem dor la shim bad ki jingtuh ki la jia ha ki jaka bapher bapher ha kylleng ka shnong, ha kaba ka jingduhnong ka la long palat da ki lak tyngka. La ai ruh ia ka kopi jong ka FIR sha u SDO ka PHE.
Namar ka jingkiew jong ka jingdih drok ha ka thain, la suba ba ia kane ka kam tuh la leh da ki nongdih drok, bad ka Dorbar Shnong ka la ai jingmut ba ki nongtuh ki lah ban dei ki briew napoh shnong hi kiba tip ia ki jaka buh pipe.
