Mynta ka sngi ka Dorbar Ki Waheh Kur Ri Jaiñtia hapoh ka jinglamkhmat u ma Khroo L. Pariat ha ryngkat ki dkhot jong ka hadien ka jingïalang bad u CEM ka JHADC u ma Thombor Shiwat ha ka jingkren sha ki lad pathai khubor ula ong hadien ka jingdawa ban thaw ïa ka aiñ kaba ïadei bad ka jingshim jait naka kmie bad ithuh ïa ki seng kur bad ki Waheh Kur ban shngaiñ ka jaitbynriew, na ka liang ka Council mynta ka sngi 29 tarik u Jylliew kala khot ïakren ha ophis treikam u CEM da kaba pynsngew sha ki dkhot ka Dorbar Ki Waheh Kur Ri Jaiñtia, ba ka EC ka JHADC kala dep rai ban thaw aiñ halor kane ka jingdawa ban ithuh noh ïa ka jait ka kynja na ka kmie.
U ma Thombor Shiwat ula ïathuh ba ka EC kala pynkhreh ïa ka Draft jong ka kyndon aiñ bad yn ai lad ïa ki Waheh Kur ban ïapeit lang ïa ka hadien bala dep thoh, hashwa ban leit rah sha ka Dorbar thaw aiñ ka JHADC ban ïoh ka jingmonjur na ka sorkar lyngba u Lat ka jylla.
‘Ka por kala dawa ba ïa ka jait ka kynja na ka kmie la dei ban ithuh noh da ka aiñ lyngba ka jingthoh,’ ong u ma Pariat, kumta ka Dorbar Ki Waheh Kur Ri Jaiñtia kala pynbna ba la weng noh ïa ka jingthmu ïakhih kan ban sdang naduh ka 2 tarik namar ba ka Coucil kala shim khia bad pyntrei ïa kane ka mat.
U ma Khroo ula ai khublei ïa baroh kiba don bynta ha ka jingïakhun naduh ki sengbhalang, ki ophisar ka JHADC, ki synjuk Waheh Shnong ha kylleng ka Ri Jaiñtia nalor kiwei de, ula kyntu ruh ïa ki seng kur ba kin shim ïaka rai ‘tang kiba shim jait na ka kmie kin long ki trai ri trai muluk’.
Ha kaba ïadei bad ka jingai ïa ki syrnot Schedule Tribe sha ki nongshong shnong Trai Ri, ka Dorbar Ki Waheh Kur Ri Jaiñtia kala kyrpad ïaka Council ban phah da ka jingthoh sha u myntri rangbah ba ïa kane ka rukom issue syrnot dei ban ïaid beit na ki Council ka JHADC, KHADC bad GHADC.
Ha kane ka jingïakynduh na ka liang ki nongïalam jong ka Dorbar Ki Waheh Kur Ri Jaiñtia kila ai ruh ïa ka Memento sha u CEM ka JHADC u ma Thombor Shiwat kum ka dak ban pynpaw ïa ka jingsngewnguh halor ka jingshimkhia jong u bad ka EC jong u ban thaw ïa kane ka aiñ ba kyrpang jong ka jait bynriew.
