Ka Khasi Students’ Union (KSU) West Khasi Hills District Unit, ha ka sngi Thohdieng jong ka 26 tarik u Jylliew, 2026, ka la pynlong ïa ka jingïalang ba kyrpang na ka bynta ban pynshlur bad pynphrang ïa ka mynsiem ieid ri hapdeng ki khun samla ka Jaidbynriew. Ïa kane ka jingïalang la pynlong ha Bishop Hall, ha New Nongstoiñ.
Ka phang pdeng ba ia kren ha kane ka Sngi ka long, “Na shlem te ngin sdang ba ka ri kan long kyrpang”.
Ha kane ka sngi la don lang ki nongïalam jong ka KSU Central Executive Council kiba kynthup ïa u General Secretary, u Samla Reuben Anderson Najiar, u Samla Sandy Sohtun asst. Organising Secretary, u Samla Gary Mawlieh Office Secretary. Nalor kine ki nongïalam ba mynta ka seng, la ïa don ryngkat lang ruh ki nongïalam barim kiba kynthup ïa u Samla Lambokstarwell Marngar, President barim KSU, u Bah Samuel B. Jyrwa, Chairman ka NESO bad President Barim ka KSU bad u Bah Danny M. Khyriem, Vice President Barim ka seng.
Ha kane ka jingïalang na ka liang ki Nongialam ki la kyntu bad pynrhem halor ka jingdonkam ban pynbiang bad pynkhreh naduh na la ïing (shlem) khnang ban kyntiew bad pynlong ïa ka ri bad ka Jaitbynriew kaba phyrnai bad kaba riewspah ha ki liang baroh.
Haba kren, u Vice President Barim ka KSU, u Bah Danny M. Khyriem, u la kyntu ïa ki Samla baroh ba kin long kiba ïa ieid kiba ïa tylli bad ki ba aiti ïa ka ban shakri ïa ka Ri bad ka Jaitbynriew lyngba ka KSU.
U lah pynkynmaw ruh ba ha ki por mynshwa ba ka Sorkar India ka lah kthong ia u Paiem Wickliffe Syiem ban kem bad ban set along ïa u Paiem Wickliffe Syiem ban pyn-ngat da ki kyndon kiba long ba u ïakhun pyrshah ïa ka India. U la pynkynmaw ruh ba kumno ka sorkar India ka la pyndonkam da kawei ka aiñ ha u snem 1987 ïa kata ka aiñ ba ki pyndonkam da ka jong ka Sorkar bilat, kaba khot TADA (Terrorist and Disruptive Activities Prevention Act) kane ka jingthmu ba ka Sorkar ha kito ki por ka long ban bom ban tied bad ban pyniap ia u Syiem Wickliffe. U la pynkynmaw ruh ba ha ki Snem ba mynshwa na ka liang ka Sorkar ka la pyrshang ban pyn-ngat ia ki dkhot jong ka Seng da kane ka juh ka aiñ kata TADA ïa lai ngut ki Nongïalam ha kito ki Snem. Hynrei hapdeng kita baroh ki Nongïalam ki lah mih beit ban aiti met bad mynsiem ban shakri ïa ka Jaidbynriew lyngba ka KSU. U Bah Danny u la pynpaw ïa ka jingsngewsih pat ka long Ha kaba arngut ki dkhot ka Seng ki lah shah siat ïap ha u kuli jong ka Sorkar ha kito ki por, kata ki long u Samla Dawanbiang Shullai bad u Samla Mekammore Ryntathiang. U la ïathuh ruh ba ka Sorkar India ka khlem ïoh ban siat ïap u Paiem Wickliffe Syiem, wat ha kito ki por ka long kaei kaei kaba Jop ïa ka Sorkar India ban pyn-ngat ia kine ki lai ngut ha kane ka aiñ TADA. U la pynpaw ruh ba haduh katta na ka liang jong kine ki lah ïai shah bad khlem kynran dien satia hynrei ki bteng ïa ka jingïakhun na ka bynta ka dawbah jong ka Jaitbynriew. “Hato kam lah dei sa ha ki tyrpeng ki dkhot ba mynta ban ïarap ban bah lem ïa ka lyngkor,” u la buh jingkylli. U la ong ruh ba ka jingïaleh kan nym pat kut, khamtam kum ïa ka ILP kaba long kawei na ki Mat ba kongsan eh jong ka Seng.
Shuh shuh u Bah Danny u la pynkynmaw ba ngi kum ki samla bad kum ka Jaidbynriew hi ba ngi dei ban bud ïa ka nuksa jong u Paiem Wickliffe Syiem, i Meiieit Spilty Lyngdoh Langrin kiba la long ki nongmuna ha ka jingïakhun na bynta ka hok longtrai ha la ka Ri.
