Ka Khasi Students’ Union (KSU) Shillong Mihngi Circle, hapoh ka jingïalam u Assistant Organising Secretary ka Central Executive Council (CEC), u Samla Jeremiah Pohthmi, mynta ka sngi ka la leit ban ïakynduh ïa u DIG ka CBI halor ka jingshna beaiñ ïa ka mandir hapoh kane ka ophis sorkar.
Haba ïakren bad une u heh ophisar ka CBI, ka la mih ka jingïania bad ka jingïatai kaba jur hapdeng ki dkhot ka seng bad ki bor pyniaid ophis. Ha kane ka jingïakren kam shym la poi shaei shaei, bad na ka liang ki dkhot ka KSU ki la pynpaw ïa ka jingsngew bitar da kaba khang tala shi syndon ïa kane ka mandir.
Haba ai jingkren na ka liang u Asst. Organising Secretary ka KSU CEC, u Samla Jeremiah Pohtmi u la ong ba tang ha kine ki snem ba lah dep na ka liang ka KSU Shillong Mihngi Circle ka la leit ïa kynduh ïa ki heh ophisar ka Ophis CBI ban pynsngew halor ka jingtei beaiñ ïa ka Madir hapoh katei ka ophis Sorkar. Na ka liang ki heh Ophisar katei ka Ophis ha kito ki por hadien ba ki la ïoh ban ïa kren bad ki nongïalam, ki la ai ka jingpynthikna ba kan nym don shuh ka jingtei ïa ka mandir hapoh katei ka Ophis, hynrei tang ha kine ki khyndiat sngi, ka seng ka la ioh jingtip ba ka jingtei ia katei ka Madir ka la iaid shait shait, na ka liang ka seng hadien ba ka la ïoh jingtip ïa kane ka la leit jurip bad ïohi ba ka jingtei ïa kane mandir hapoh kane ka Ophis ka lah jan dep bad hadien kane ka seng ka la khang tala shi syndon ïa kane ka Mandir.
Ka seng ka la maham bad ai por shi taiew ïa ki bor ba dei peit ban pynpra ne pynduh noh syndon ïa kane ka mandir hapoh ka ophis sorkar. Ka seng ka maham ruh ba lada kim leh eiei hapoh kane ka por ba la buh, ka seng ka la maham ba kan sa shim da kiwei pat ki sienjam ba kham eh halor kane ka mat.
