U Chief Executive Member (CEM) ka JHADC u ma Thombor Shiwat mynta ka sngi 14 tarik u Naitung, 2026 ula plie paidbah ïaka official Website jong ka ‘Jaiñtia Hills Autonomous District Council’ haka jingïalang ba la pynlong ha Conference Hall jong katei hi ka ophis.
Ha kane ka sngi la wan ban donlang naduh u EM ba dei peit ïa ka Statistic & Information Department u ma Medling M Swer uba la ai ki kyntien pdiang sngewbha, u Chairman ka JHADC Dr. Sankey Shangpung, ki MDC ka JHADC naduh ki liang synshar bad ka liang pyrshah, ki ophisar jong ka JHADC nalor ki nongtrei jong ka Council.
Na ka liang u ma Thombor shiwar haba ai jingkren ha kane ka jingïalang ula pynsngew lyngba ka jingtrei shitom jong ka Executive Committee, mynta ka sngi la lah ban plie paidbah ïa kane ka Official Website daka jingïarap bad ka jingpynwan dur jong ka National Informatics Centre, Ministry of Electronics & Information Technology jong ka sorkar India.
‘Kum ki nongtrei ka Council ba kynthup ïa ki MDC baroh ki dei ban don ka jingïatrei lang ban pynbha shuh shuh ïa kane ka Website katkum ka jingdawa jong ka por, khnang ba kan nym ïalam bakla ïa ki paidbah’ ong u ma Thombor.
Shuh shuh ula ong ka jingdon jong kane ka Website https://jhadc.nic.in/ ki paidbah ki lah ban ïoh shibum ki jingtip kiba ïadei bad ka Council, ka jingtip ïaki aiñ ki kyndon, ki Forms jong ka Council kiba donkam naka bynta ki paidbah, ka dor jong ki form nalor kiwei de.
Ula ong ka jingplie ïa kane ka Website ka long ka jingjop kaba khraw ïaka Council wat hapdeng ki jingshah kynthoh halor ka rukom treikam, da kaba u ong bunsien ki paidbah ki peit tang ki jingduna hynrei ïa kaba bah ki kham duna kiba ïohi.
Ha ka juh ka por ula ai khublei ïa ki Ophisar bad ki Technical Team kiba peit ïa kane ka website ba kin long kiba husiar bha haba pyntreikam ïa ka, khnang ba kan long ka jingmyntoi ïa ki paidbah nongshong shnong.
Baroh ki jingïoh bad ki jingpynlut la donkam ban buh beit ha kane Council, khnang ba kan long kaba khuid ba suba haka rukom treikam, Ula pynsngew wat ïa ka tulop ki nongtrei ka Council mynta la leh da ka online payment.
Ha kaba ïadei bad ka tulop jong ki nongtrei u ma Thombor Shiwat ula pyntip ba ka Council hadien ka jingïapynbeit bad ka sorkar jylla yn pyllait noh shisien pyllait ïa ka pisa kaba dangsah khnang ban siew dep noh ïa ka tulop ki nongtrei bad ka Council kan pyrshang nangne shakhmat kan siew noh manla u bnai ïa ka tulop.
Katba ïa ka jingbatai bniah shaphang ka rukom treikam jong kane ka Website la ai da ka kong P. Langstang, Computer Engineer, ïa ki kyntien ai khublei la ïoh na u A. Mohrmen, uba dei u Head Computer & System Engineer.
