Ki Ar tylli ki kynhun seng bhalang kata ka Jaiñtia National Council (JNC) Central Executive Committee bad ka Jaiñtia Students’ Union (JSU) Central Body ha ryngkat ki nongrep bad ki trai jaka na ka Shnongrim, Elaka Nongkhlieh, East Jaiñtia Hills District kila leit tur syndon shapoh ka phyllaw ka Jaiñtia Hills Autonomous District Council (JHADC).
Kane ka jingleit tur da kaba ïaid rally paidbah kaba la sdang naduh madan dai masi (Ladthadlaboh) sha JHADC, hashwa ba ki poi ha khyrdop heh (Gate) ka JHADC ki pulit kila pynsangeh ïa ki ban rung shapoh bad hadien kane ki paidbha kila sdang ban kyndang jubor haduh ban da lait bad thmu rung shapoh ophis da kaba kyndang ïaka jingkhang (Grill) hynrei ki nongïalam kila pynjai jai bad pynlong da ka jingïalang ha phyllaw jong katei ka ophis.
La pynlong ïa kane ka rally ban pyrshah jur ïaka projek tih mawshun jong ka Company Shree Cement ha Lum Syrman haka jingheh kaba 652 hectare bad dawa jur na ka JHADC ban pynduh pyndam ïaka NOC bad ban pyndam ïaka jinglong Dolloi u Dolloi ka Elaka Nongkhlieh ban pynïoh ïa ka hok ki nongrep bad ki trai jaka ha Lum Syrman.
Na ka liang ki nongïalam ba hakhmat jong kitei ki ar seng kila pynsngew ïa ka jingjop jong ki daka jingïasnohkti lang ki paidbah ban pynpulom ïa ka (Public Hearing) jong ka kharkhana dewbilat M/S Shree Cement haka 22 tarik u Jymmang, 2026.
U President ka JNC u bah Sambormi Lyngdoh u ong ka jingwan ka Shree Cement kala pynkhie thiah ïaki khun ka Ri-Lum Jaiñtia bad pynim ïa ka mynsiem ïaleh jong u Kiang Nangbah pyrshah ïa ka jingwan ki bar jylla.
Ula pynrem jur ïa u Dolloi ka Elaka Nongkhlieh uba la ai bor bad soi ïa ki jaka ki puta bad ka Shree Cement, halor kane ula buh jingkylli kumno ïa ka hok jong ki nongshong shnong la die da utei u Dolloi wat ka kyndon aiñ jong ka JHADC kam shem la ai bor ïa u Dolloi ban leh khlem jingtip ka Council, ula kynthoh ruh mynta Shree Cement kala pyndonkam da ki mafia ban pyntieng pynsmiej ïa ki para doh para snam.
‘Wat ïaka History ka Ri-Jaiñtia da ka jingdon ki krem ba itynnad ka sorkar mynta kala kwah ban pynduh pyndam ïaki tang na ka bynta ka jingmyntoi shimet’ ula ong.
Shuh shuh ula pynsngew naduh ki nongïalam saiñ pynthei, ki nongïalam shnong, ki Elaka kim don shuh ka jingtieng burom ïa U Blei haduh bala pynlong ïa ki ban shim ïa ki rai leh donbor khlem da kheiñ shuh ïa ki paidbah kiba dei ki trai jaka.
Ula buh jingkylli ïa u Myntri Rangbah ka jylla ka don mo ka aiñ ban leh donbor ïa ka kyndew ka shyiap jong ka ri bad ka jaitbynriew, Kumta u kyntu hashwa ba ka ding kan klang ka JHADC kala dei ban pynbeit kloi ïa kane.
U President ka JSU ula pynkynmaw naduh bala poi ki Cement Plan naduh u snem 2004 baroh ki khlaw ki btab kila shah pynjulor lut haki thaiñ Narpuh bad mynta sha ki taiñ Nongkhlieh bad ka myntoi aiu ka jingwan jong ki wat ka jingkular pynïoh kam ïa ki trai jylla haduh 70 % kam urlong satia haduh bala hap mih ban pynlong ki jingïakhih.
‘Ngi dawa na u CEM bad baroh ki MDC kiba don hapoh ka JHADC ba kin hiar shuki noh lada kim lah ban pynbeit ïa kane ka jingeh na ka jingwan ka Company Shree Cement bad ban weng ïa ka NOC kumjuh ïa u Dolloi namar kane ka jingïakhin kan long tang ka jingsdang’ ong utei u President ka JSU.
Ula kyntu ïa ka Council ban pynlong ka jingleit kynra ïa ki bar jylla lada kim leh ka seng kam banse ban leit beh noh shi syndon ïa ki.
Na ka liang ki nongrep jong katei ka thaiñ kila pynpaw ka jingduhnoh kaba khraw eh halor kane ka jingleh donbor u Dolloi ka Elaka Nongkhleih khlem ka jingtip jong ki, kila pynsngew ruh ïa ki jingeh kiba lah ban ktah ïa ka mariang na ka jingtip mawshuh kaba ktah ïa ka lawei jong ki khun ki kti.
