Ka All Sohkha Development Committee (ASDC) West Jaiñtia Hills District kala pynbeit ban pynlong ïa ka jingsam khusnam kaba Khad Hynñiew (17th) jong ka, ïa kaba la tip kum ka “17th ASDC- Awards’ Distribution 2026” na ka bynta kito ki khynnah skul kiba wan shakhmat haka kyrdan (1st Division) ha ka Secondary bad Higher Secondary Level jong u snem 2021 haduh u snem 2026.
Ïa kane ka prokram yn pynlong haka 17 tarik u Jylliew, 2026 ka ban sdang naduh ka por 1:00 baje nohphai sngi ha phyllaw ïingskul barim jong ka Sohkha Govt. Higher Secondary School, Sohkha.
La pyntip ba u Myntri Rangbah ka sorkar jylla u Conrad K. Sangma un long kum u kongsan ha katei ka sngi, ha ryngkat ka jingdonlang u symbud kongsan ma Lahkmen Rymbui uba dei u MLA ka thaiñ bad u myntri ka tnad pule puthi ka jylla nalor kiwei de.
Ha kaba ïadei bad kane ka prokram ka ASDC ka buh ka jingkyrpad ïa kito ki khynnah skul kiba wan shakhmat ha kitei ki Examination jong ki snem ba la kdew haneng ba kin shim ïa kane ka kabu kum ka dak jong ka jingpynkup burom ïa ki. Pynkut ka kyrwoh na u ma P.S. Suchen u Secretary ka ASDC.