Ka Khasi Students Union (KSU) mynta ka sngi, 11 tarik u Nailar, ka la pynlong ïa ka jingïalang paidbah ha khmat u Mot Kiang Nangbah ha phyllaw ka jaka treikam jong u Deputy Commissioner ka East Jaiñtia Hills District, Khliehriat. Wat la ym shym la ai jingbit satia ban pynlong ïa ka jingïalang hapoh ka jaka treikam jong u Deputy Commissioner, hynrei ka KSU ka la pynlong ïa ka jingïalang ha ka rukom kaba jai jai. Na ka liang ki bor District ruh ki la buh ia ki pulit khang ba yn ym don kano kano ka jinghuri hura.
Ka KSU ka la ai por hapoh 15 sngi ïa ka sorkar ban pyntreikam ïa ki san tylli ki mat jingdawa jong ka. Kawei na ki mat ba kongsan ka long ban pynduh ïa ka Public Hearing jong ka Shree Cement kaba la long ha ka 31 tarik Naitung, 2026, ryngkat bad ka jingdawa ban pyntreikam ïa ka MRSSA (2016) bad kiwei ki mat jingdawa kiba kongsan. Nalor ki dkhot jong ka KSU, ki nongmihkhmat jong ki kynhun sengbhalang bapher bapher bad ki paidbah ki la wan ïashim bynta ha kane ka jingïalang.
U President jong ka KSU, u Streamly N. Suchen, haba kren sha ki lad pathai khubor u la ong ba kine ki mat jingdawa ki dei kiba ka seng ka la pynsngew lypa ha ki por kiba la leit. U la ong ba ka KSU ka la buh palat 20 tylli ki mat jingdawa sha ka sorkar, hynrei mynta ka la pynleit jingmut ha ki san tylli ki mat kiba kongsan. U la pyntip ruh ba ka KSU CEC ka la mynjur ban pynlong ïa ki jingïalang paidbah ha kylleng ka “Bri u Hynniewtrep.”
U samla Suchen u la ong ba ka KSU ka la jied ia katei ka jaka ba don u Mot Kiang Nangbah kum ka jaka pynlong ïa ka jingïalang mynta ka sngi namar ba ïa kane ka durmot la buh shwa ban wanrah ïa ka ophis jong u Deputy Commissioner sha kane ka jaka. U la ong ruh ba ka seng ka ju pynlong ïa ki jingïalang hajan ki durmot jong ki riewshlur kiba la ïaleh na ka bynta ka jinglaitluid. U la pynshai ba kane ka jingïalang kam dei satia ka jingïakhun pyrshah ïa ka ophis jong u DC.
U Suchen u la kynnoh ruh ba ha ka 31 tarik Naitung, ha ka por ba ka Public Hearing jong ka Shree Cement ka long, kiwei pat ki nongshong shnong ha East Jaiñtia Hills District ki la pynlong ïa ka jingïakhih pyrshah ïa ka Goldstone Cement Company, da kaba kynnoh ba ka company ka la shukor ïa ki. U la ong ba ka company ka la kular ban ai kam, hynrei kam shym la pyndep ïa kata ka jingkular. Katkum ka jingong jong u, bun ki samla pule bad ki samla ki hap ban leit sha kiwei pat ki jaka ban wad kam namar ki company dewbilat kiba don ha district kim shym la ai jingmyntoi ïa ki paidbah nongshong shnong.
U Wanshwa Suting, General Secretary jong ka Jaintia Students Union (JSU), u la ong ba ka seng ka ai ka jingkyrshan ïa ka KSU namar ba ki la mad ïa ka jingleh jubor ha ka Public Hearing kaba la long ha ka 31 tarik Naitung. U la kynnoh ba ka MSPCB ka la khot ïa baroh ban wan sha ka Public Hearing, hynrei ka la khanglad ïa katto katne ki nongshong shnong bad ki sengbhalang kiba pyrshang ban rung sha ka jaka pynlong naduh ka 30 tarik Naitung. U la kynnoh ba tang kito kiba kyrshan ïa ka Public Hearing kiba la shah rung bad ba ka sorkar ka la pyndonkam da ka bor pulit ban pynthikna ba ka Public Hearing kan ïaid shakhmat, kaba la kyntait ïa ka hok jong ki paidbah ban pynsngew ïa ka sur jong ki.
U Suting u la ong ba ka Elaka Nongkhlieh ka dei kawei na ki jaka ba kongsan ha ka jingïoh jingïarap bam jong ka district. U la bynrap ba ki nongïalam jong ka JNC kiba la shah kem ha kata ka sngi ki la shah leh kumba ki dei ki nongïaleh pyrshah sorkar; ki pulit ki la phong mask bad rah pistol. U la ong ba ki la sngewkyndit namar tang saw ngut ki nongïalam JNC kiba don ha kata ka jaka bad kim tip balei ba la shah kem. U la pynrem ïa ka jingpyndonkam ïa ka bor da kaba ong ba ka long pyrshah ïa ka Riti Synshar.
U Livingson Dkhar Sama, President Jaintia Students Union, East Jaiñtia Hills, u la ong ba ka seng ka kyrshan ïa ka KSU namar ki jingsngewkhia halor ka Public Hearing jong ka Shree Cement. U la pynrem jur ïa ka jingpyndonkam bor jong ka sorkar pyrshah ïa ki paidbah, ki sengbhalang bad ki nongshong shnong bad u la pynpaw ïa ka jingpyrshah ïa ki heh sorkar kiba don bynta ha kane.
U Michal Chyrmang, Information Secretary jong ka FKJGP, u la ong ba ki san tylli ki mat jingdawa jong ka KSU ki long kiba don nongrim. U la ong ba ka seng FKJGP, kaba ju ïatreilang bad ka KSU ha kiba bun ki kam, ka la wan ban pyni ïa ka jingkyrshan. U la kynnoh ruh ba ka sorkar ka la pyndonkam da ka bor ban khanglad ïa ki paidbah ban rung sha ka Public Hearing bad u la dawa ban pynsangeh ïa ka kam jong u Deputy Commissioner bad u Superintendent of Police.
