U Deputy Commissioner ka West Jaiñtia Hills District, Jowai u Abhinav Kumar, IAS mynta ka 11 tarik u Nailar ula plie ïaka Natural & Craft Mart ha phyllaw ka ophis treikam jong u lyngba ka jingïarap jong ka District Mission Management Unit (DMMU) bad ka Meghalaya State Rural Livelihoods Society (MSRLS), shi bynta ban pynïaid ïew ïa ki mar rep bad ki mar ki mata tynrai kiba la pynmih hi da ki SHG bad ki trai shnong.
Ha kane ka prokram la wan ban ïashim bynta lang naduh u Chief Operating Officer ka Meghalaya State Rural Livelihoods Society u bah Shanlang Lyngdoh, ka Project Director DRDA bad ka Nodal Officer DMMU kong B. Blah, ki State Mission Manager, ki nongmihkhmat na ki tnad jong ka CLFS, ki VOS, ki SHG bad ki nongïalam shnong.
U Deputy Commissioner ka WJHD u Abhinav Kumar Singh haba ai jingkren ula ai khublei ïa Project Director, DM bad ïa baroh ki kynhun kiba don bynta lang ban pynpaw pyrthei ïa ki mar rep tynrai kiba pynmih napoh ka District khnang ban ïoh pynïaid ïew ïa ki sha kiwei de ki jaka.
Shuh shuh ula ong ka Natural & Craft Mart kan long kum kawei na ki rynsan kaba lah ban pynpoi ïa ki mar tynrai bapher bapher napoh ka District lyngba ki SHG bad ban pynïaid ïew da ka jingïarap ka ophis u DC ryngkat ka MSRLS.
Ka Project Director ka DRDA kaba dei ka Nodal Officer ka DMMU kong B. Blah kala ai khublei ïa ka jingtrei shitom jong baroh ki seng treimon sngewbha (SHG) halor ka jinglah jong ki ban pynmih shibun ki mar rep, Ka la ong ruh ki dang don ki mar rep napoh ka West Jaiñtia Hills ki dang sahkut khlem da tip bha da ki nongthied namar ka jingbym don ka rynsan pyni nam. Kala pynpaw ka jingkyrmen ba ka Natural & Craft Mart kan ïarap ban pynsngewthuh kham bha shaphang ki mar rep ka thaiñ bad ban ai lad ïa ki SHG ban pynïaid ïew ïa ki.
Kiwei de kiba ai jingbaitai shapang ka jingdonkam jong ki mar rep tynrai kiba lah ban pynmih hi napoh ka District bad ban pynïaid ïew shabar ki kynthup ïa u Chief Operating Officer, MSRLS, Shri Shanlang Lyngdoh, District Mission Manager, MSRLS bah R. Shadap.
Katba u bah Kynsai Kharkongor, DFS SISD ula pynsngew halor ka jingnoh synñiang palat 5000 tylli ki Self-Help Group, 284 tylli ki Village Organisations (VOs) bad 25 tylli ki Village Federation (VLFs) haka bam ka dih bad kiwei de ki jingdonkam jong ka jingim, ula kyntu ban don ka jingïatreilang bad ki tnad sorkar ban pynbha ïa ka rep ka riang bad ban pynmih shibuh jait ki mar ki mata. Ïa ki kyntien ai khublei la ïoh na u W. Pale DFS, Non-farm.
