Ka Khasi Student Union (KSU) CEC ha ka 3 tarik Nailar 2026 ka lah ban buh da ka dorkhas sha ka ophis u Myntri Rangbah ka jylla u Conrad K Sangma ban dawa na ka Sorkar ban pyntreikam ia 5 tylli ki mat jingdawa ka Seng hapoh 15 sngi.
Haba kren bad ki lad lad pathai khubor u General Secretary ka KSU CEC u Samla Reuben Najiar u la ong ka Seng ka lah wan buh da ka jingthoh ban dawa pyntreikam ia 5 tylli ki mat na ka sorkar bad ai por ruh haduh 15 sngi ia ka sorkar ba kan pyntreikam ia ka jingdawa jong ka Seng bad lada ka Sorkar kam pyntreikam ia ki mat jingdawa jong ka Seng, ka Seng kan sa shim da kiwei ki sienjam kata ban pynlong da ki jingiakhih.
Ki mat jingdawa ba ka Seng ka la dawa ka long ban weng kam noh ia u Deputy Commissioner ka East Jaintia Hills, u SP ka East Jaintia Hills, ia ki nongtrei ka Meghalaya State Pollution Control Board halor ka jingjia ha Lum Syrman haba ia dei bad ka Public hearing jong ka Shree Cement, Ka Seng ka dawa ruh ban pynduh noh ia ka Public hearing jong ka Shree Cement.
Shuh shuh u Samla Reuben Najiar u la ong ba ka Seng ka dawa na ka Sorkar ba dei ban pyntreikam noh mardor ia ka MRSSA 2016 kumjuh ruh pyntreikam ia ka Migrant Worker Act 2020 kaba la sahteng mynta lah 2 snem. Nalor kata u la pynpaw ba ka Sorkar ka dei ban pyntreikam noh mardor bad ban pynbeit noh mardor halor ka kynrum kynram kaba mih ha NEIGRIHMS bad kumjuh ban pynduh Noh ia ki Personal Interviews haba iadei bad ka Group B, C bad Group D katkum ka jingpynbna jong ka Sorkar India bad kumjuh ban wanrah ia ka thungkam thungjam kaba khuid haba iadei bad ka MPSC bad DSC jong ka jylla bad kumjuh ban pyniaid bad ban pyntreikam katkum ka SOP ha kiwei ki bynta thungkam thungjam.
Ha ka jingkren khatduh ka Seng ka aipor 15 sngi ban pyntreikam bad ban pynurlong ia kine ki mat kiba ka Seng ka la buh jingthoh sha ka Sorkar bad lada kam lah ka Seng KSU kan sa pynlong da ki jingiakhih bapher bapher.