Ka Society for Environment Protection and Sustainable Development (SEPSD), lyngba u Chairman jong ka u bah WN Dkhar, ka la pynpaw ïa ka jingkyrshan kaba pura ïa ka Public Hearing jong ka SHREE Cement, kaba la buh ban long ha ka 31 tarik Naitung, 2026.
Ha u kyrwoh ba la pyllait da u Chairman u bah WN Dkhar, ula ong ba ka jingkyrshan jong ka seng ïa kane ka Public Hearing ka long katkum ka jingkular jong ka Company ban ai kam ai jam ïa ki samla shnong, ban kyntiew ïa ka roi ka par jong ki shnong ba marjan bad ban plie ruh ïa ki lad jingïoh kam bad jingïoh jingïarap ïa ki nongtih mawshun bad ki nongpynbiang mawshun na ka thaiñ.
Halor ka jingiadei bad ka mariang, u Dkhar ula ong ba dei ban bud pyrkhing ïa baroh ki kyndon jingïada ïa ka mariang katkum ka Factory Act, 1948 bad ka Environment Protection Act, 1986.
Nalor kitei ki kyndon, u la ong ruh ba ka sorkar Jylla ka la thaw ïa ka District Mineral Foundation Fund, kaba dei ka pisa jingïarap na ki Company ban pyndonkam ha ka jingpynbha bad jingïada ïa ka mariang bad ban kyrshan ïa ki kam pynroi bapher bapher na ka bynta ka bha ka miat jong ki paidbah nongshong shnong.
Ha kaba kut, u Dkhar ula ong ba ka jylla ka lah ban kiew shaphrang ha ka roi ka par lyngba ka jingdon jong ki karkhana (Industrialisation) da ka jingïatreilang bad jingkitkhlieh lang jong baroh ki paidbah nongshong shnong.