Ka National People’s Party (NPP) 7-Amlarem Block kala pynlong ïa ka jingïalap Election ïa u kyrtong jong ka u Dr. D.R.L Nonglait sha ka MP Lok Sabha shiteng samoi na ka 1-Shillong Parliament Constituency (ST) haka jingïalang paidbah bala pynlong ha kane ka sngi Saitjaiñ ha Khlachympa Hall, Nongtalang, West Jaiñtia Hills District.
Ha kane jingïalang la pynïaid da u Ex-MLA ka thaiñ ma Stephanson Mukhim, ha kaba u Symbud Myntri Rangbah ka jylla ma Sniawbahlang Dhar ula wan ban donlang, nalor ki MDC, ki nongkitkam ka Party bad ki paidbah nongkyrshan kiba la wan pyndap ïa ka Hall bad ban sngap ïa ki mat ki jura jong ka Party. Ha kane ka sngi la pdiang dkhot thymmai ruh ïa kiba la rung party sha ka NPP bad la plie paidbah ïa ka jingrwai ka Party da u symbud Myntri Rangbah.
Ha kane ka sngi na ka liang u kyrtong ka NPP u Dr. D.R.L Nonglait ula pynsngew ïa ki mat treikam jong u bad ka party kata ban pynbha, ban tei bad ban pynshai.
U Dr. Nonglait haba kren u pynpaw ka jingsngewnguh ïaki nongtrei kam ka party kiba la lah ban pynlong ïa kane ka jingïalang kaba shongshit da ka jingwantuid ki nongkyrshan. Ula pynsngew ruh ïa ki kam kiba ka sorkar kala leh naduh ka roi ka par bad ka jingkylla dur jong ka jylla ha baroh ki liang naduh ba ïoh synshar ka sorkar MDA.
Shuh shuh ula kular ban ïakren pynbeit bad ka sorkar kmie ban pyntreikam noh ïa ka jingdawa ban pynrung ïa ka ktien Khasi hapoh ka Khyrnit ba phra, jong ka riti synshar ka ri bad ban pynurlong ïa ka jingdawa ka sorkar jylla ïa ka ILP.
Ula pynsngew ruh halor ka jingkiew jong ka kam jngohkai pyrthei ha kane ka thaiñ War Jaiñtia namar ka jingriewspah jong ka mariang ha kiba bun ki liang, ha kaba ka sorkar kala wanrah ïa ki skhim bapher bapher na ka bynta ka jingmyntoi jong ki paidbah bad ïa ka shnong ka thaw hi baroh kawei.
“Ka sorkar kala ïaleh mynta katba lah ban weng ïa ki jingeh haka pule ka puthi da ka pynbeit thymmai ïa ka jingsiew sha ki nonghikai, ka jingtei ïa ki ïing skul bad ki college. Nalor ka jingwanrah ïa ki lad ban kamai kajih ha kaba ki khun samla ki lah ban seng ïa ki kam la jong lyngba ki skim bapher bapher”, la ong u Dr. Nonglait.
Kumta u khot ïa ki paidbah nongkyrshan ba kin jied ïa u MP uba don ha ka sorkar khnang ban suk ka jingïakren sha ka sorkar kmie, ha ka juh ka por u thrang ban pynneh pynsah ïa ka riti ka dustur bad u kyrpad ban pynïoh Distinction ïa u 80 percent na katei ka Consituency jong ka Amlarem ha ka jingïoh votes.
