Ka Pnar Student Movement (PSM), Central Body, hapoh ka jingïalam u President, u E. Passah, bad u General Secretary, u W. Wann, ki la leit ban aiti da ka jingthoh sha u Superintending Engineer (SE) ka Meghalaya Power Distribution Corporation Limited (MePDCL), Jaintia Hills Distribution Circle, ha ka 9 tarik Risaw 2025, halor ki jingeh bad ki jingdawa kiba ïadei bad ka 33/11 KV Priang Sub-Station, kaba sam bording sha Priang, Saphai, Khonshnong bad kiwei pat ki shnong ha ka thaiñ 13 shnong.
Ki mat jingdawa kiba ka seng kala nuh ki kynthup ïa ka jingthut bunsien jong ka bording namar ka 33KV incoming line ka iaid na poh ki khlaw barben, ban pynkiew kyrdan ïa ka Priang Sub-Station, ban pynbiang ïa ki DO Switch ha man la ki shnong bad ka jingthung ïa uwei u Lineman ban pynbha ïa ka maintenance bad jingshakri ïa ki paidbah.
Katkum ka jubab na ka ophis u Superintending Engineer ka MePDCL, ka 33KV incoming line kaba wan na Khliehriat Sub-Station ka la rim bha, namar la shna ïa ka naduh ki snem 1980, bad ka don ka jingjrong kumba 37 km, kaba ïaid lyngba ki khlaw bad ki bynta kiba eh ban poi. Ka MePDCL ka la pynshai ruh ba kane ka line ka dang long ka lifeline kaba kongsan jong ka Priang Sub-Station, hynrei ka jingpynneh bad jingsumar ïa ka feeder ka long kaba eh.
Ka MePDCL, kum ka jubab ïa ka jingdawa jong ka PSM, ka la pyntip ba la ithuh lypa ïa ka alternative 33KV feeder route ban pynïasoh ïa ka Mowkaiaw Sub-Station bad ka Priang Sub-Station, kaba don ka jingjngai kaba kumba 24 km.
Ka Corporation ka la pyntip ruh ba ka survey halor kane ka route ka la dep ban leh, bad ka la dep bam pynkhreh ïa ka DPR (Detailed Project Report)
Ka ophis u Superintending Engineer ka la pdiang ïa ka jingdawa ban pynkiew kyrdan ïa ka Priang Sub-Station ha ka shnong Priang sha ka Control Room-operated Sub-Station. Katkum ka jubab, ïa ka DPR halor kane ka kam la dep ban pynkhreh bad aiti.
Ka ophis ka la pdiang ruh ïa ka jingdawa ban pynbiang ïa ki DO Switch ha man la ki shnong, bad la bthah ïa u Executive Engineer, Jowai Rural Distribution Division, ban shimkhia ïa ka kam bad ban leh ïa kaba donkam halor kane.
Ka MePDCL ka la pdiang ïa ka jingdawa jong ka PSM ban pynmih bad buh u wei u Lineman, khnang ban pynkhlaiñ ïa ka jingpynneh, jingsumar bad jingshakri ïa ki paidbah ha ka thaiñ 13 shnong.
Halor kine ki jubab, ka Pnar Student Movement (PSM) ka ai khublei bad ka pdiang ïa ka jingpynshai bad ka jubab jong ka MePDCL halor ki mat kiba la wanrah da ka seiñ. Ka PSM ka sngewkmen ba ka Corporation ka la shimkhia ïa kine ki jingeh kiba ïadei bad ka jingshaniah jong ki paidbah ha ka bording, ka jingpynbha ïa ki jingtei, ka maintenance bad ka jingshakri bording ha ka thaiñ 13 shnong.
Ka PSM ka kyrmen ba ka jingpynshna ïa ka Alternative 33KV Feeder, ka jingpynkiew kyrdan ïa ka Priang Sub-Station, ka jingpynbiang ïa ki DO Switch, bad ka jingthung ïa uwei u Lineman, kin ïarap ban pynkhlaiñ ïa ka rukom sam bording bad ban pynbha shuh shuh ïa ka jingshakri bording sha ki paidbah jong kine ki thaiñ.
Kane ka long katkum ka kyrwoh ba la phah da u Publicity Secretary ka Pnar Student Movement (PSM), u samla S. Lakiang.