Ka Deputy Commissioner (R) ka East Khasi Hills ka kong R. M. Kurbah ha ka 15 tarik Naitung, 2026 kala khot ia ka jingialang ban ïakren halor ka jingkyntur jaka hapoh ka Right of Way (RoW) ha shilynter ka surok Shillong sha Dawki ba dang shu shna thymmai, ha kaba u Manager (P), NHIDCL, PMU-Mylliem u la pynpaw ïa ka jingsngewkhia halor ki nongshong die kiba wan die jingdie ha ki bynta jong ka Rilbong Point, 3 1⁄2 Mile Upper Shillong bad 7th Mile Upper Shillong, bad ruh halor ka jingbuh ia ka jaka pynieng kali ha Rilbong Point.
Namar ba kane ka jingkyntur jaka, ka lah ban wanrah jingma ia ki paidbah nongleit nongwan, ki nongdie bad kumjuh ruh na ka bynta ka jingleit jingwan jong ki kali, ka jingialang ka la rai ba ki nongtrei na ka tnad Pulit (Shillong Traffic Police); ka PWD (Roads), ka NH Division Shillong bad ka NHIDCL ki dei ban iatreilang ban pynkynriah noh ia ki nongdie madan.
Ka jingialang ka la rai ruh ba ka NHIDCL ka dei ban buh ia ki dak ha shilynter ki bynta jong ka surok ba la shim. U Superintendent of Police (Traffic) u dei ban buh ia ki jingker ban khanglad ia ka jingpynieng kali hapoh ka RoW bad ban buh ia ki pulit ha katei ka jaka.
Ha ryngkat ka jingiatreilang ka NHIDCL, ka PWD (Surod) NH Division bad ki Pulit yn sa phah kynriah noh ia kitei ki jingpynwit pynthud hadien ba la dep ban ai ka jingpynsngewthuh sha baroh.