Ki thliew kiba heh bad jylliew kiba don ha shilynter u surok naduh na Loom Sooiung Newhill, Jowai ha ki thaiñ Ladthalaboh ter ter kala buh jingma ia ki kali motor bad wat ia ki nongiaid nongieng ruh.
Ka jingdon bun kine ki thliew bun sien ki kali ki pyrshang ban kiar na ki, hynrei kane ka jingkiar ia ki thliew ka lam pynban sha ka jingma namar ba hap ban iaid sha ka liang ka bym dei (wrong side) bad kane ka lah ban wan rah ia ka jingtyngkhuh kali ne ka jingshah lymbub jong ki nongiaid nongieng.
Ki nongiaid lynti ha kine ki thaiñ bun sien ki dap da ka jingsyier, namar ka jingbym don ki Footpath, wat lada don katto katne ki jaka ba don Footpath ruh ki don tang shiliang ka surok.
Kane ka jingsniew jong u surok kala long da ki bun bun bnai mynta, ha kaba ki bor ba dei peit kim shym la leh ei ei. Haba la poi ka por slap lei kane ka jingma ka dang ap shuh shuh, namar ka jingbymlah jong ki nongñiah kali ban iohi ia ki thliew ki syar kiba la dap um, bun sien ki hap ban sangeh syndet bad kane ka lah ban jia ka jingiatakhuh kali.
Bun na ki nongñiah kali bad ki riew paidbah kila ud bha ia kane ka jinglong jingman jong une u surok, hynrei ka shu kut tang ha ka jingkhñium namar ki bor ba dei peit kim leh ei ei. Hynrei la katta ruh ki buh ka jingkyntu ia ki bor ba dei peit ba kin pyndap ia kine ki thliew khnang ban shngaiñ bad iada ia ki kali motor bad ruh ia ki riew paidbah nongiaid nongieng.
