Ka Federation of Khasi Jaiñtia & Garo People (FKJGP), West Jaiñtia Hills District mynta ka sngi Thohdieng 27 tarik u Lber kala pynlong ïa ka jingïaid rally ha ryngkat ka jingrah lama bad placard bad jingpyrta pynrem ïa ka sorkar, ia kane ka jingiaid rally la sdang na Lad Kiang Nangbah Jowai shaduh Iawmusiang Jowai, ban pynlong ka jingïalang pynsngew paidbah. Ha kane ka rally la wan ban ia shim bynta lang ruh naduh ki nongshong shnong khappud, ki nongialam shnong bad kiwei de ki seng.
Hashwa ban pynlong ïa ka jingïaid rally ha Lad Kiang Nangbah ïa ka jingialang la pynïaid da u Marhok Marboh u President ka WJHD, katba ha Iawmusiang la pynïaid da u bah Nangkhrang Rani, General Secretary FKJGP WJHD.
Ka seng kala leh ïa kane kum ka dak ban dawa mardor na ka sorkar ha kaba ïadei bad ka jingpynbeit noh ïa u pud u sam ha ka jylla, ïa kane ka juh la dep ban pynlong ha Ri-Bhoi District bad kumjuh ha West Khasi Hills bad mynta ka Jowai, hadien kine ki lai tylli ki jingïalang ka seng kan pynlong da kaba kham heh ha Nongbah Shillong lada ka sorkar ka kam sngap ïa ka jingdawa.
Kiba buh na ki nongkren kila pynrem jur ïa ka jingsngap jar ka sorkar jylla haduh mynta ban pynbeit ïa u pud u sam ba pura bad baroh ki sorkar kila heh tang ka ktien khamtam ha ki por Election, katba ïa ka kam kaba dei ban leh na ka bynta u pud u sam kim patiaw satia naduh bala ïoh ïa ka jylla ha u snem 1972.
Ha ka jingïalang ha Iawmusiang la ai jingkren kynthup naduh ki nongïalam shnong na Lapangap, Mukroh, na u ma Kmen Myrchiang uba dei General Secretary ka Co-Ordination Committee on International Border (CCIB), u Chandame Sungoh na ka HBDRF, ki nongïalam ba hakhmat ha FKJGP naduh u bah Cundee Cliff Khongsit President, u Eldie Lyngdoh General Secretary, kiwei de ki nongkitkam ka FKJGP, nalor ki nongïalam ka KSU, JSU bad ka longkmie na Lapangap.
La kren halor ka jingbym lah ban pynbeit ïa u pud u sam hapdeng ka Assam bad Meghalaya kala ktah jur ïa ki nongshong shnong ha kiba im ha ki thaiñ khappud, nalor ka jingshah ktah, sa ki jaka khappud bad ka Ri Bangladesh na ka jingker sainar Shiah, shuh shuh kila kynnoh sa katno tylli ki mynsiem briew ki ban shah siat ha ki ktang suloi jong ka Assam na ka daw ka jingkyntur pud.
