Uwei u samla uba kyrteng u Kynsai Chyrmang na Ladthadlaboh Jowai da ka jingshlur jong u, ula jngi ban leit pynlait im ïa uba ngamjyllop ha kawei ka wah kaba ki khot Mublai kaba don hajan ka Wah Myntdu ka lynti ban leit sha Haven’s Cove kaba jngai tang katto katne na Syntuksiar.
Kane ka jingjia kala jia ha ka 23 tarik mynta u bnai haka por kumba 2 baje nohphai sngi katba ki saw ngut shi paralok ki dang ïajngi pynngad ha katei ka wah, hynrei kynsan kynsan uwei na ki ula ngam jyllop mar ïohi ïa kane u Kynsai Chyrmang u bym dei u paralok jong ki ula leit ban pyllait im ïa u.
Ha kane ka jingïajngi pynngad shi paralok ki 2 ngut na kine ki sawngut ki dang ïasum ha kane ka wah uwei na ki ïa uba la tip kyrteng kum u Pynyomiki Bareh uba na ka shnong Umladang ula ngam sa ki bynta ba kham jylliew bad u la sahkut namar ka jingbat u shyiap bad um lah jngi shuh katba u paralok jong u, uba ïa jngi ryngkat u pyrshang ban tan ïa u hynrei um lah satia bad u ruh ula jan ngam jyllop lang hangta.
Da ka jingtieng ula mih sa lum bad leit pan jingïarap na kita ki paralok hynrei kita ki paralok jong u ruh kim lah ban jngi sha ki bynta ba u sahkut, hadien katto katne por ula per ha sla um, kine ki paralok ki jong u kila leit pan jingïarap na kawei pat ka kynhun jong ki samla kiba don shajan bad mar mar u Kynsai Chyrmang da ka jingshlur ula noh ïa lade sha um bad leit ïarap tam ïa u da ka jingïarap u Wanrapbor Khonglam la lah ban sei ïa u sha lum.
Kila pyrshang ban ïaleh katba ban ban ïarap pynim ïa u Pynyomiki Bareh namar ba um lah shuh ban ring mynsiem, kila pyrshang ban ñion na kpoh jong u ban pynmih ïaka um, kida leh daka CPR ruh, hadien katto katne por u Pynyomiki ula sdang ban ring mynsiem biang bad ula sdang ban tipbriew pat.
[Photo: Representation Image Only]