Ki nongkyrshan jong ka NPP hynnin ka sngi kila poi da ki hajar ngut sha ka jingïalang paidbah ban ïalap By Election ïa u Dr. D R L Nonglait u kyrtong MP Lok Sabha na ka 1-Shillong Parliament Constituency (ST) ha madan Khawang, Ummulong bala khot pynlong da ka NPP 1-Nartiang Block.
Ha kane ka sngi na ka liang u kyrtong ka NPP u Dr. D.R.L Nonglait ula pynsngew ïa ki mat ki jura na ka bynta ka jingtreikam jong u bad ka party kata ban pynbha, ban tei bad ban pynshai.
U Dr. Nonglait haba kren u pynpaw ka jingsngewnguh ïa ki nongtrei kam ka party kiba la lah ban pynlong ïa kane ka jingïalang kaba shongshit da ka jingwantuid ki nongkyrshan. Ula pynsngew ruh ïa ki kam kiba ka sorkar kala leh naduh ka roi ka par ha baroh ki liang kaba la wanrah ka jingkylla dur ïa ka jylla.
Kum u kyrtong MP un trei da kaba buh hakhmat ban pynbha ïa ka rep ka riang, ban buddien ïa ki skim bad ki Project bapher bapher jong ka jylla sha Delhi, kymjuh ruh ban peit ïa ka rukom bei tyngka ka sorkar shapoh ka jylla.
Shuh shuh ula kular ban ïakren pynbeit bad ka sorkar kmie ban pyntreikam noh ïa jingdawa ban pynrung ïa ka ktien Khasi hapoh ka riti synshar ka ri bad ban pynurlong ïa jingdawa ka sorkar jylla ïa ka ILP.
Kum u kyrtong MP u kyrmen skhem ban jop da kaba ïoh Distinction na baroh ki Constituency hapoh ka 1-Shillong Parliament seat. Ula kyntu ruh ban jied ïa u namar u long kum u kyrtong jong ki paidbah.
Kiwei de kiba ai jingkren ki kynthup ïa u symbud myntri rangbah ka Jylla u ma Sniawbhalang Dhar, u myntri ka tnad ka koit ka khiah u ma Wailadmiki Shylla bad u Dr. Celestine Lyngdoh (MLA), ha ka jingdonlang ki MDC, ki nongkitkam ka Party bad ki paidbah nongkyrshan.
