Ka sorkar jylla ka la phah shuh shuh ia ki pulit SF-10 sha ka shnong Lapangap ban pahara bad iada ia ki lyngkha rep hadien ka jingbthah na u Deputy Chief Minister u Ma Sniawbhalang Dhar sha ki bor synshar District jong ka West Jaiñtia Hills.
U Deputy Chief Minister u Ma Sniawbhalang Dhar u la bthah ïa u Deputy Commissioner Abhinav Kumar Singh bad u Superintendent of Police u Jagpal Singh ban pynkhlaiñ ïa ki lad jingïada ha kane ka thaiñ khappud ba don ka jingïakajia khnang ban pynthikna ïa ka jingshngaiñ jong ki nongrep.
Hadien ba ki paidbah nongshong shong ka Lapangap bad ki sengbhalang ba kynthup ia KSU ka JNC bad kiwei kiwei ki sengbhalang ki la ïakynduh ïa u Deputy Chief Minister ha Secretariat.
Ki nongshong shnong ka Lapangap ha ryngkat bad ki Sengbhalang ki la tur sha Secretariat ban dawa na ka sorkar ban buh pulit pahara na ka bynta ka jingshngaiñ ki nongrep ha katei ka thaiñ.
Hadien kane ka jingiakynduh, ka sorkar jylla ka la bthah ia u DC bad SP ba kin kren ha kane ka jingialum paidbah shabar ka Secretariat bad ban pynsngew lyngkot sha ki paidbah ia ki lad jingiada.
U Deputy Commissioner u la pynpaw ba la buh shuh shuh ïa ki shipai SF-10 ha Lapangap hadien ki jingïakynad dang shen hapdeng ki nongshong shnong bad ki bor pahara ha ki jaka rep. Katkum ka jingiathuh ki trai shnong, ki bor pulit mynta ki dang ap pahara ia ki jaka rep ban iada na ka jingiakynad bad jinghuri hura ha katei ka thaiñ.
Kane ka jingphah Pulit ka long hadien ka jingbthah ba dang shen na u Dy CM u Sniawbhalang Dhar uba la bthah ïa ki bor synshar district ban buddien bha ïa ka jinglong jingman jong ka aiñ bad ban pynthikna ïa ka jingïada ïa ki nongrep kiba trei ha ki lyngkha. Ka sorkar ka kwah ban pynthikna ba kan ym don kano kano ka jingjia kaba sniew ne ka jingkulmar paidbah kaba jia ha Lapangap.
Hynrei ki don ki nongshong shnong kiba la bteng ban pynpaw ïa ka jingsngewsih halor ka jingpynkynriah bun ki pulit ha ki jaka rep, da kaba ong ba ka jinglong jingman ka pyni ïa ka jingïakynad kaba dang ïai bteng ha kane ka thaiñ.
u Deputy Chief Minister u Ma Sniawbhalang Dhar u la ong ba ka jingialang kam dei bad ka jingiakajia pud hapdeng ki jylla hynrei ka dei beit ban iada ia ka kamai kajih bad ka jingshngaiñ jong ki nongrep.
“Ka jingiakren mynta ka sngi kam dei satia halor u pud u sam. Ngi la iakren halor ka jingiada ia ka kamai kajih bad ki kam rep jong ki paidbah ka Lapangap. Ka mat pud ka dei ka mat ban shim ha ka kyrdan jong ka sorkar jylla”, u la ong.
U Deputy Commissioner u la pyntip shuh shuh ba dang shen ka Assam ka la thaw ia ka sorkar kaba thymmai, bad la khmih lynti ba u Myntri Rangbah ka Jylla Meghalaya u Conrad K. Sangma un sa rah ia kane ka kam shen sha u Myntri Rangbah ka Assam.
“Ngi dang ap ruh ïa ka jingthung ïa u Chairman ba thymmai jong ka Regional Committee na ka liang ka Assam khnang ba ka jingïakren ba thikna kan ïaid shakhmat,” ong u DC.
U la bynrap ruh ba ka jingdon jong ki pulit kiba la don lypa ha katei ka jaka kam pat biang bad ba ka sorkar kan sa phah shuh shuh ïa ki bor pahara ban pahara ïa ki nongshong shnong bad ki nongrep kiba sah ha khappud.
Ki nongialam ka KSU ki la pynpaw ruh ba ki la iakynduh ia u Deputy Chief Minister, uba la pynthikna ba ki nongrep kin ioh ban sdang biang ia ka jingrep da kaba suk nangne shakhmat.
“Ngi la ïakynduh ïa u Deputy Chief Minister Bah Sniawbhalang Dhar bad u la pynthikna ïa ngi ba naduh lashai ka sngi ki nongrep kin lah ban bteng ïa ka rep ka riang khlem kano kano ka jingpynthut,” ong uwei u nongïalam ka KSU.
Ka seng ka la maham ba lada ka sorkar kam lah ban pyndep ia ki jingkular jong ka, ki paidbah nongshong shnong kin hap ban shim khia shuh shuh ban iada ia ki nongrep trai ri.
“Ngi rep ha la ka jong ka jaka, hynrei la kynnoh ba ki briew na ka liang Karbi ki wan ha ka por miet bad pynjulor ia ki jaka rep jong ngi, kane ka dei ka jingeh kaba ngi ia kynduh man ka por”, u la ong.
U la bynrap ba kumba 95 percent ki nongshong shnong ki sngewhun ïa ka jingleh jong ka sorkar hynrei ki dang khmih lynti ba ki bor pynïaid kin pyntreikam pura ïa ki bor pahara kiba biang, kynthup ïa ki Pulit SF-10.
“U Inspector General bad u Superintendent of Police ka West Jaiñtia Hills ruh ki la don lang ha kane ka jingïalang bad ki la pynthikna ruh ba naduh lashai ka sngi yn sa buh ïa ki bor pahara kiba biang ban ïada ïa ki nongrep ha Lapangap.