Ki Paidbah Nongshong shnong jong ka Lapangap da ki spah-spah ngut ki la tur sha Secretariat ha ka 13 tarik Jymmang 2026 ban dawa na ka sorkar ban buh pulit pahara na ka bynta ka jingshong shngaiñ ki nongrep ha Lapangap.
Ka jingwan tur ki paidbah nongshong shnong ka Lapangap ka dei hadien ba ki nongrep ki la iakynduh jingeh bad shah khanglad ha ki jait bynriew Karbi bad ki Pulit Assam ban leit sha ki Lyngkha jong ki.
Ka jingwan tur ki paidbah sha Secretariat la ialam da u Waheh Shnong u Bah Deimonmi Lyngdoh ha ryngkat ka jingsynran lang da ki dkhot sengbhalang ba kynthup ïa ka Khasi Students Union (KSU), Jaiñtia National Council (JNC) bad kiwei kiwei ki kynhun.
Ki Pulit kiba la ïoh jingtip ïa ka jingwan tur ki paidbah ka shnong Lapangap, naduh mynstep ki la pynjur ïa ka jingpahara ha IGP Point bad ha phyllaw ka Secretariat.
Ha ka por shiteng sngi ki paidbah kiba la tur da kaba suk shakhmat ka ophis Secretariat watla ka la don ka jingïapynibor bad ki Pulit kiba la syrtap ha shilynter surok naduh Malki Point ter ter shaduh IGP Point.
Hadien kane, u Symbud Myntri Rangbah ka Jylla u Bah Sniawbhalang Dhar uba dei ruh u MLA jong ka Nartiang Constituency u la khot ïakren ïa ki nongïalam ka shnong Lapangap.
Shwa kane, ki Pulit ki la hap ban synreit da u pepper spray ïa ki paidbah ha kaba ki la don kiba sat tyrha ki khmat na ka jingsied ki puipui pynsat khmat.
Katto katne ki nongshong shnong ka Lapangap ki la kren diaw halor ka jingbym shimkhia jong ka Sorkar Jylla ban weng ïa ka jingeh kaba ki paidbah ki la mad na ka jingshah khanglad ki Pulit Assam bad ha ki paid Karbi ban leit rep sha ki lyngkha nalor ba ka aiom bet ïa u symbai ka la jan kut por artad.
Ha ka jingïakren bad ki lad pathai khubor, katto katne ki longkmie ki la kynnoh da kaba ong ba ki Pulit Meghalaya kim nud hi ruh wat tang ban leit synran ïa ki paidbah sha lyngkha hynrei ki shu shong thiah sngi ha ka ktem sah jong ki bad ki shu dih kyiad manla ka sngi.
Uwei pat u rangbah, u la ong, ba ki hali, ki pynthor bad ki lyngkha kiba don hapoh ka shnong Lapangap ki dei hi shispah na ka shispah ki nongkynti jong ka shnong Lapangap kaba hap hapoh ka Elaka Shiliangmyntang, West Jaiñtia Hills District hynrei namar ka jingbym shimkhia jong ka Sorkar bad ki bor synshar District ki jaidbynriew Karbi ki ioh lad ban pyndik na ka por sha ka por.
U la ong ba lada ka Sorkar ka shimkhia ïa ka jingeh jong ki paidbah ka la dei ban beh shwa ïa ki Pulit Assam kiba shong ktem beaiñ ha u Lum Pynthor uba don ha ka shnong Lapangap.
U la pynpaw ruh ïa ka jingsngewlynngoh ba ka Sorkar ka shu phah ïa ki Pulit ban shong ban sah hapoh ka shnong Lapangap katba kim nud satia ban leit sah sha khappud ban synran ïa ki nongrep katba ka Sorkar Assam ka phah ïa ki Pulit ban rung shaduh u pud u sam ka shnong Lapangap.
