Ka JNC Western Zone hapoh ka jingïalam u President jong ka, u Hamehi Bamon ryngkat ki dkhot jong ka seng ki la ïakynduh ïa u Myntri ka tnad pule puthi u Lahkmen Rymbui mynta ka sngi ban pynbor ban pyllait noh mardor ïa ka advertisement na ka bynta ban thungkam nonghikai sha ki skul sorkar Lower bad Upper Primary skul. Ka jingdawa ka dei kyrpang ia ki kyrtong kiba la dep ban pyndep ïa ka test jong ki nonghikai, ka Meghalaya Teachers Eligibility Test (MTET).
La aiti ïa ka dorkhas sha u Myntri ba donburom, ryngkat bad ka kopi ba la phah ruh sha u Secretary, ka tnad pule puthi.
Ha kane ka jingiakynduh, ka seng ka la pynpaw ia ki jingeh kiba jur ha kaba ïadei bad ka jingbun ki kam hikai kiba lait ha kylleng ka jylla Meghalaya, kiba mynta ki don kumba 677 tylli. Ka jingsam ïa ki kam ba lait katkum ki district ka long kumne harum:
- East Khasi Hills: Shillong (53), Sohra (6)
- Elaka Ri-Bhoi: Nongpoh (30)
- West Khasi Hills: Nongstoiñ (21)
- Eastern West khasi: Mairang (29)
- South West Khasi Hills: Mawkyrwat (29)
- West Jaintia Hills: Jowai (44), Amlarem (27)
- East Jaintia Hills: Khliehriat (31)
- West Garo Hills: Tura (80), Dadenggre (47)
- South West Garo Hills: Ampati (84)
- East Garo Hills: Williamnagar (50)
- North Garo Hills: Resubelpara (71)
- South Garo Hills: Baghmara (75)
Ka JNC Western Zone ka la kdew shuh shuh ba palat 31,000 ngut ki samla kiba la dep pyndep ïa ka eksamin MTET. Hynrei bun na kine ki kyrtong kiba la biang ki la jan ne ki la palat ïa ka rta (over age), kaba la pynmih ïa ka jingsngewkhia shaphang ka jinglong hok bad ka jingduh ïa ki lad ki lynti.
Halor kane, ka seng ka la kyntu jur ïa ka Sorkar ban pynmih noh kloi ïa ka jingpynbna thung kam khnang ban pynthikna ïa ka jingjied kaba shai bad kaba kynthup lang ïa baroh, bad ban weng ïa ka jingduna nonghikai kaba jur ha ki skul ha kylleng ka jylla.
Ka seng ka la ban jur ruh ba ka jinghiar ka kyrdan pule ha Meghalaya ka don ka jingïadei kaba jan bha bad ka jingduna ki nonghikai. Ka jingpynkhlaiñ ïa ka bor hikai, kan pynbha shibun ha ka pule puthi bad kan ai jingmyntoi ïa ki paidbah jong ka jylla.
Haba kren halor kane, u President ka JNC Western Zone u la pynpaw ba ka jingpynbun ïa ki nonghikai kan ym tang ba kan weng ïa ka jingkyrduh kam hapdeng ki kandidet kiba tbit hynrei kan kyntiew ruh ïa ka jinglong jingman jong ka pule puthi baroh kawei haka jylla.
Haba jubab, u Myntri Pule Puthi ba donburom, u Lahkmen Rymbui, u la pynthikna ïa ka seng ba ka sorkar kan shim ïa ki sienjam ba donkam ban pynmih noh kloi ïa ka jingpynbna na ka bynta ki kam ba lait hapoh kine ki khyndiat bnai ban wan jong une u snem.