U Myntri Rangbah ka jylla u Conrad K Sangma ha ka 9 tarik Jylliew 2026 u la pyllait paidbah ia ki bos elektrik (e-bus) hapoh ka PM E-Bus Seva Scheme.
Ha kane ka sngi ba ba pyllait paidbah ia ki E- Bus la ia don lang naduh u Chief Secretary ka jylla ki ophisar ka sorkar jylla bad kiwei kiwei.
Haba kren ha kane ka sngi u myntri rangbah u la ong ba ka jingsynshar kam dei tang ban don ia ka jingthmu hynrei ka dei ruh ban pynkylla ia kata ka jingthmu sha ki kam kiba thikna. U la kdew ba ka jingpynbha ïa ki kali paidbah ha Shillong ka la long kawei na ki jingeh ba khraw tam jong ka sorkar, bad la pyrshang ïa ki rukom bapher bapher ha kine ki snem, kynthup ïa ki rukom pynïaid ïa ki bos skul, ki bos paidbah ba ju pyndonkam, bad mynta ki bos elektrik.
U Conrad Sangma u la ong ba ka sorkar ka dang iai bteng ban thaw ia ka rukom kaba iahap bha bad ka jingdonkam jong ka nongbah Shillong. Ka jingthmu ba kongsan, u la bynrap, ka long ban pynduna ia ka jingkhapngiah da kaba pynshlur ia ki briew ban pyndonkam ia ki kali paidbah ha ka jaka jong ki kali shimet.
Haba pynpaw ïa ka jingkmen halor ka jingpynmih ïa ki e-bus, u la ong ba yn sa pynmih shuh shuh ïa kum kine ki bus ha ki por ban wan. U Myntri Rangbah ka Jylla ula kdew ruh halor ka jingshna ïa ki jaka ieng kali ha kylleng ka nongbah Shillong, khamtam eh ïa ka jaka kaba don hajan ka Additional Secretariat, kaba la sakhi mynta ïa ka jingpyndonkam kaba jur bha. Katkum ka jingong jong u, kane ka pyni ia ka jingkylla suki suki ha ka jinglong jong ki paidbah bad ka jingpdiang ia ki lad pyniaid kali kiba thymmai.
Shuh shuh u Sangma u la ong ba ka New Administrative City kaban sa wan ha Mawdiangdiang kan don ka bynta kaba kongsan ban pynduna ïa ka jingkhapngiah ha nongbah Shillong. Ka sorkar ka dang pynwandur ia ki surok kiba bun kiba pyniasoh ia ka nongbah kaba la don lypa bad ka Secretariat kaba thymmai. Nalor kata u la ong Shisien ba la pynkynriah ia ki ophis sorkar kiba bun hangta, kan sa don ka jaka kaba kham bun hapoh Shillong na ka bynta ban pynheh ia ki surok, ki lynti iaid kjat, ki jaka jyrngam, bad ki jaka paidbah.
Halor ki kali elektrik (EV), u Myntri Rangbah ka Jylla u la pyntip ba ka polisi jong ka jylla kaba ai jingpyllait na ka bai rejistar bad ka khajna surok na ka bynta ki EV ka la kut noh hadien lai snem. Hynrei ka sorkar ka dang pynkhreh ban pynthymmai bad pynjlan ia kane ka polisi hadien ka jingialang ka kynhun myntri ka ban sa long shen.
U la kyntu ia ki nongshong shnong ban shim ia ki kali elektrik, da kaba batai ba ki long kiba lah ban treikam, kiba pynduna ia ka pisa, bad kiba iadei bad ka mariang, khamtam na ka bynta ka nongbah Shillong.
Haba kren shaphang ki jingeh kiba ju jia ha kaba ïadei bad ki lad pynbiang u la kdew ba ïa ki EV lah ban charge da kaba suk ha ïing, kumba long ki mobile phone. Haba ïathuh ïa ka jingshem shimet jong u, u Sangma u la ong ba u la niah da ka kali elektrik na Shillong sha Sohra bad kaba pyni ba ki EV ki treikam bha ha ki jaka lum. U myntri rangbah u la pynbna ruh ba ki heh sorkar bad ki myntri sorkar suki suki kin sdang ban pyndonkam ia ki kali elektrik ban ai nuksa bad ban pynshlur ia ki paidbah. U la kdew ba ka jingbuh ia ki jaka charge mynta ka long kaba suk bha bad lah ban leh tang hapoh khyndiat sngi lada don jaka ieng kali kaba biang. Ka sorkar ka kloi ruh ban kyrshan ia ki paidbah bad ki trai jaka kiba kwah ban seng ia ki jaka charge EV.