Ka Central Executive Committee jong ka Jaiñtia Youth Federation (JYF) seng kmie ka pynpaw ïa ka jingsngewnguh kaba khraw ïa ka sorkar Meghalaya hapoh ka jingïalam u Myntri Rangbah ka jylla u Conrad K Sangma, na ka bynta ban wanrah ïa ka skim One-Time Settlement Scheme ïa baroh ki kali kamai hapoh ka jylla.
Halor kane ka JYF mynta ka sngi kala phah da ka jingthoh sha u Myntri Rangbah ka jylla lyngba ka ophis u DC Jowai ban dawa na ka sorkar jylla ba kan pyntreikam lang ïa kane ka One-Time Settlement Scheme na ka bynta ki kali shimet kiba don hapoh ka jylla Meghalaya.
Shuh shuh la pynpaw ki trai kali shimet ruh ki shem jingeh ban siew ïa khajna hadien bala kut ka por jong ki kot kali naduh ba la sdang ka khlam COVID-19 bad kiba bun hi kim shym la lah ban siew ïa ki khajna kali bad kiwei de ki jingsiew ba la buh da ka aiñ.
Ka seng kala pynsngew baroh ki trai kali shimet kiba don ha kylleng ka thaiñ Ri-Lum Jaiñtia bad ha baroh kawei ka jylla kila kyrpad jur na ka sorkar jylla ba kan bishar bniah ïa kane ka jingdawa da kaba pyntreikam lang ïa kane ka (OTS) Scheme na ka bynta ki kali shimet kumjuh.
Kane ka long katkum ka kyrwoh khubor ba la phah da u President ka JYF-Central Boby samla Ombormi L Tariang bad General Secretary samla Oswald B Nampui.