Mynta ka sngi ka Dr. Mazel Ampareen Lyngdoh kaba dei ka kyrtong na ka seng NPP kala leit hiar sha ha Shnong Sahsniang-A West Jaiñtia Hills na ka bynta ban pynlong ïa ka jingïalap elekshon jong ka ha katei ka shnong.
Ha kane ka sngi ïa ka jingïalang la pynïaid da u Waheh Shnong ma Duhki Ymbon, la ai jingkren kynthup naduh u ma Comingone Ymbon (MLA), ma Wailadmiki Shylla (MLA), ma Nehmaya Tyngkan, ma Lasting Suchiang, ma Aibor Shadap MDC, ma Habahun Dkhar MDC nalor kiwei de.
Ka Kong Ampareen kum ka kyrtong MP kala pynsngew da ka ba ong ba kum ka kynthei kan peit nyngkong ïa ki kup shiliang ki sem shiliang khamtam kito kiba don ha ki jaka nongkyndong, kala ong lada ki 36 tylli ki Constituency kin pynjop ïaka kum ka MP kala kular ban trei shitom na ka bynta ka jingmyntoi ki paidbah.
Kala kren shai ba kam trei na ka bynta ka jingmyntoi ïalade shimet namar ka jingpoi jong ka sha ka kam shakri paidbah ka dei lyngba ka jingïalam lynti jong ka longïing longsem kaba la hiar pateng ha kane ka kam shakri paidbah.
Kala kular ynda kan wan ha ka jingjop kum ka MP kan ïakren ïa ki mat jingdonkam jong ki paidbah jong ka Jylla Meghalaya hapoh ka ïing dorbar Parliament ha Delhi.
Na ka liang u ma Wailadmiki Shylla ula ong ka long kaba sngew phylla kiba bun kiwei ki party kila beiñ bad kynnoh ïa ka party NPP, hynrei ka Party NPP pat ka dang pdiang manla ka sngi ïa kiba wan rung shapoh ka ïing jong ka.
U ma Wailadmiki ula ong khambha ban jied ïa ka kong Ampareen namar ynda ka la wan haka jingjop shibun ki kam pynroi kin wan poi shapoh kane ka thaiñ jong ka jylla lyngba ka jingïatrei lang jong ka NPP kaba synshar mynta hapoh ka jylla bad kane ka kham pynsuk ïa ka jingïakren bad ka sorkar kmie.
Shuh shuh ula kynthoh halor u MP jong ka Congress u ma Vincent H. Pala uba la leit sha Delhi kum u MP la bun tylli ki snem khlem da wanrah ïa ki skhim bapher bapher.
Katba u ma Commingone Ymbon ula ong ba ym donkam shuh ban peit shano shano namar ka kong Ampareen ka lah don lypa haka Party NPP, da kaba u ai nuksa ban peit sha Garo Hills, ki lah don lypa ïaka Agatha Sangma.
U ma Coming ula ong ba u bah Ardent u long uba donbok tam ban ïoh ïaka Constituency ha Nongkrem ka bym don kam ïa kiwei kiwei jait skim hynrei tang ka MLA skim ka lah biang ïa ki, hynrei kiba bun ki Constituency ki donkam shibun ki jingmyntoi naduh ki jaka pule, ki jaka sumar, ki Sports bad kumta ter ter.
U ma Nehemaya ula ong la 10 snem mynshwa ula ngad haka jingjynjar lyngba ka jingïaid lynti bad ka seng Congress, hynrei kane ka dei ka por bala ih bha ïa u ban rung sha ka NPP.