U Honorary General Secretary ba rim ka West Jaiñtia District Sports Association (WJDSA), u ma Lammat oo Laloo ha kane ka sngi Saitjaiñ ula aiti noh ïaki kot ki sla jong ka Association sha ki nongkitkam ba thymmai haka jingïalang ba la pynlong ha Kiang Nangbah Indoor Stadium, Ladthadlaboh Dongmihsngi, Jowai.
U ma Lammat oo Laloo ula ïathuh naduh u snem 1994 ula sdang ban bat ïa ki kam hapoh ka Association bad kala kynjoh sha ka 30 snem tam, u ma Lammat oo Laloo ula bat teng kum Referee Football haduh 30 snem, 14 snem kum u Football Secretary bad 16 snem kum u Honorary General Secretary ka WJDSA da kine ki kam ula synñiang shibun ki kam ban kyntiew ïa ka kam ïalehkai Sports hapoh ka District.
Haba ai jingkren u ma Lammat oo Laloo ula ong kam long kaba suk ban shimti ïaka kam treimon sngewbha da ki bun tylli ki snem namar ki don shibun ki jingeh. Kumta ula kyntu ïa baroh khamtam ïa kiwei de ki para nongkitkam ba kim dei ban ïawad daw ïa ki jingduna jong u, hynrei dei ban trei shitom shuh shuh khnang ban pynïaid beit shakhmat ïaki kam ka Association.
Ha kane ka sngi ula aiti ïa ki kot ki sla jong ka Association sha u Honorary General Secretary ba thymmai u ma Ryum T Khonglah kiba kynthup naduh ki kot ba ïadei bad ka madan Kiang Nangbah, ka pisa, ki register, ki kot ba tei ïa ka ‘Toilet’ da ka Rotary Club Jowai, ki kot kes ba ïadei bad ka Demthring, ka list jong ki Club, ki Tender jong ka khyrdop (Gate), ki Cash book, ka stock register, nalor kiwei kiwei de.
Kum ka dak ban kyrshan lem ïa ka Association ha ki kam ba bun, ka Executive Committee jong ka WJDSA ha katei ka sngi Saitjaiñ kala jied ïa u ma Lammat oo Laloo kum u Adviser ka Association.
Na ka liang u Working President ma EMH Passah ula ai ka jingïaroh ïa u ma Lammat oo Laloo halor ka kam jong u kum u General Secretary, uba la pynsngew kumba long ka madan ïalehkai mynta bad ka jingkiew ka kam ïalehkai Sports hapoh ka District ka dei da ka jingtrei shitom u Ex General Secretary, ula kyntu ïa ka ophis ba thymmai ba kin ïatreilang da ka juh ka jingmut ban kyntiew ïa ka kam Sports.
Kumban shu kdew ki nongkitkam bathymmai ka WJDSA na ka bynta ka samoi treikam 2026-2029, ki kynthup ia u President uba dei beit u Deputy Commissioner ka WJHD, Working President ma EMH Passah, Vice President ar ngut ma T. Ram Phawa bad Cheini Niangty, Honorary General Secretary Ryum T Khonglah, Joint Secretary Supply H Dkhar bad ma Monlang Nongtdu, Football Secretary ma Amity Tongper, Assistant Football Secretary Mayalang Lanong, Athletic Secretary Marso Kyndait, Indoor Secretary Arkiyo Passah, Archery Secretary ma Heibor Pariat, Auditor ma Orilan Shylla bad ma R. Piky Suwer.
Ki Executive Council members pat ki dei u ma Teddy Laloo, ma Freddy Lakiang, ma Chanki Lhuid, ma Famous Plain, ma Heimonlang Lypon, ma Ram Kyndait bad ma Manbha Ryngkhkem. Nalor ki Branch Committee.
Katba ki Branch Committee, ha ka Football Committee: Chairman ma T. Ram Phawa i/c Football & Referees Committee, kynthup lang ia 5 (san) ngut ki dkhot. Katba u ma Cheini Niangti i/c Athletic, Archery bad Indoor ha ryngkat sa 5 (san) ngut ki dkhot.
