Ka JNC Western Zone hapoh ka jinglamkhmat u bah Hamehi Bamon, President jong ka seng ryngkat bad ki dkhot ki la ialeit ban ia kynduh ia ki ar ngut ki Executive Engineer jong ka P.H.E kiba dei peit ia ka West Jaintia Hills District, kita ia u E.E jong ka Electricals Division bad u E.E jong ka Civil Division ba incharge jong ka R.W.S. u ma Sokima Najiar ha kaba ka seng ka la ai ruh bad ka jingthoh ha kitei ki ar EE, ha ka jingiadei bad ka jingpyntrei torti ia ka skim Jal Jeevan Mission (JJM) kaba dei ka hok jong u paitbah.
Ka seng hadien ba ka la ioh ia ka jingud jingnam na kiba bun ki nong shongshnong jong ka District, namar hadien ba la bun ki shnong kiba la dep ban trei bad pynshna ia ki top um, ia ki pipe um ban pynpoi um sha ki ïing ki briew hynrei ka kam ka la shu sahkut khlem ka jingpynpoi um ha ki top um lane sha ki ïing briew.
Ha ka jingshim jingkhein jong ka seng la lap ba ka jingpyntrei ia ka skim JJM na ka 100% ka long tang kumba 25% ki shnong ki ba poi um bad kiba biang um kiba la ioh kat kum ka hok jong ki na kane ka skim supply um. Wat lada bun ki shnong na ka liang ki tnad kane ka department ki la plie bad ki la kam ba ki lah dep ban pyntrei tangba kane ka rukom pyntrei kam don jingmut bad kam don jingmyntoi iaki paitbah, kat kum ba lalap da ka seng wat ba ki lah kam ba ki lah dep ban pyntrei ruh hynrei kam long kaba trei kam, ki top um ki pipe um ki lah tyrkhong bad ki la sdang sop sarang, ha kaba ia dei bad kane ka seng ka la ong don ei ei shalyndet ba ki la pyndonkam bakla iaka pisa paitbah na ka daw bym shimkhia na ka department ia kine baroh.
Ka JNC ka la kyntu jur ia kine ki E.E ba kin leh ia kane ka kam kham kloi ban pynpoi iaka um katkum ba dei ban poi sha baroh ki shnong ki jaka ki bym don um bad ki bym iaid ryntih ka rukom pynpoi um ha ki top lane sha ki ïing biew kat kum ka skim ka hok jong u paitbah ha kino kino ki shnong ba lah dep ban pyntrei da ka Skim JJM.
Naka liang kine ki sahep PHE ki la kular ia ka seng ba kin shimkhia ban leh ia kane ka kam kham kloi ha kine hi ki sngi ban pynbha bad leit jurip ha kylleng ki shnong, khamtam ha kito ki shnong bym wan ka um ha ki top lane bym poi um sha ki ïing briew.
Ka seng ka maham ia ka Department ban pyntreikam noh hapoh 2 bnai ha kaba iadei bad kane ka jing ujor, ka seng kam shong kli kti lada ka seng ka dang lap ba kim shimkhia ia kane ka kam kat kum ka kamram jong ki, kaseng kan sa leh da kawei pat ka lad ka lynti ba kham tyngeh.