Watla ka bor synshar District ka la kyntait ban ai jingbit ïa ka jingïalang mynta ka sngi, hynrei ka JCOMSWA ka la pynlong ïa ka jingïalang kaba suk mynta ka step ha khyrdop jong ka ophis u Deputy Commissioner jong ka East Jaiñtia Hills District, Khliehriat ban dawa ïa ka jingpynbeit ïa ki jingtih dewïong kiba la sahkut slem bha.
Ki kynthei, ki rangbah bad ki samla ki la iashim bynta, da kaba rah ia ki lama bad ki plakad kiba thoh ban plie biang ia ki kam tih dewiong ha ka District.
Hadien ba la ïakynduh ïa u Additional Deputy Commissioner u bah A. Nongbri, u President ka JCOMSWA u bah Marshall S.B Biam u la iathuh ha ki lad pathai khubor ba ka bor synshar ka la mynjur ban shim khia ia kane ka kam. U la ong ba katei ka jingialang paidbah ka dei ka jingbuddien ia ka jingshah thngan khlem buh por jong u kaba u la leh mynshwa. Namar ka jingjur jong u slap bad ki jingpynthikna jong ka bor synshar, ka seng ka la pynsangeh noh ïa ka jingïakhih.
U Bah Biam u la ong ba ka seng ka la aiti ia kajuh ka memorandum sha ki katto katne ki tnad, kynthup ia ka tnad kam poh iing ka sorkar jylla, ha kaba ki kyrpad ban plie biang ia ki kam tih dewiong. U la maham ia ka sorkar ba katei ka kynhun kan sdang biang ia ka jingiakhih lada ym lah ban pynbeit ia ki jingdawa jong ki.
