Mynta ka sngi ka 5 tarik u Nailar 2026, ki nongialam ka Seiñ Raij Sohkymphor ki la ai jingkren sha ki lad pathai khubor halor ka jingpynkhreh na ka bynta ka Behdeiñkhlam ka Seiñ Raij Sohkymphor 2026 ha ka shnong Sohkymphor, East Jaiñtia Hills district.
U ma Phaiwon Suchiang President ka Seiñ Raij Sohkymphor u la pyntip ba ia ka committee la sdang ban shna naduh ba sdang u snem na ka bynta ka Behdeiñkhlam jong une u snem bad la shna ruh ia ki katto katne ki Sub-committee ha kine ki taiew na ka bynta ban pynkhreh ia kane ka tamasa ka ban sa long ha ka 11 tarik u Nailar 2026.
Lyngba kine ki Committee ki la sdang ban pynkhreh ia ki pandal, bad ban maramot ia ka surok kaba leit sha ka jaka pynlong tamasa.
Mynta u snem ka komiti ka la khot sngewbha ia u Symbud Myntri Rangbah ka Jylla Meghalaya u ma Sniawbhalang Dhar kum u kongsan, bad u ma Kyrmen Shylla kum u kongsan. Kiwei kiba la shah khot ki long u Deputy Commissioner, u Superintendent of Police, ki nongialam ka JHADC, bad kiwei de.
U President ka Seiñ Raij Tuber u la ong ba ki la pan jingiarap pisa na ki nongialam ka jylla na ka bynta ki jingtei ha katei ka jaka pynlong tamasa.
Ha kane ka Behdeiñkhlam yn iashim bynta ar tylli ki shnong katta ka Urim Khliehshnong bad ka shnong Sohkymphor ha kaba ym duna ia ka 13 tylli ki Rong bad ki Rot ban pyni ha kane ka leh niam Behdeiñkhlam. Ka Seiñ Raij ka la khmih lynti palat 10,000 ngut ki paidbah ki ban wan poi ha kane ka sngi.
U la kitbok kitrwiang ia baroh ba kin wan suk sha kane ka tamasa bad kyrmen ba ki jingpynkhreh kin long kiba jop. U la kyntu ia kito ki bym pat ju wan sha katei ka tamasa ba kin wan sakhi lang, khamtam mynta u snem, namar ba u Deputy CM u ma Sniawbhalang Dhar un long kum u kongsan.
