Ka Jaiñtia National Council (JNC) Central Executive Committee lyngba ka publicity Cell ka la pynpaw ïa ka jingsngewkhia kaba jur halor ka rukom pynlong ïaka public hearing kaba ïadei bad ka jingthmu ban tei ïa ka projek Shree Cement ha Elaka Nongkhlieh, East Jaiñtia Hills ha ka 31 tarik u July 2026, khamtam eh ha ka jingjia bala iohi lyngba ki khubor kiba la mih hadien jong ka jingpyni bor bad shah Thombor ki paidbah, khamtam ki nongpyrshah naka Elaka Sutnga bad elaka Nongkhlieh, ki jingshah khang lynti ha ka por bad sawdong jong ka Sngi public hearing.
Ngi ai ka jingkyrshan kaba pura iaka ultimatum kaba 15 sngi kaba la pynmih da ka Khasi Students’ Union (KSU) sha ka Sorkar Meghalaya, da kaba dawa ba dei ban pynduh noh ia ka public hearing bad ban pynbeit ia ka jingkitkhlieh kaba biang na ka bynta ka jingpyniaid jong ki bor ba dei peit.
Ka public hearing katkum ka ain jong ka mariang (environmental law) ka long ban pynthikna ia ka jingiashim bynta kaba laitluid, kaba hok, bad kaba don jingmut jong ki briew kiba shah ktah. Hynrei ka jingsngewsih pat ka long ba la khanglad ia ki trai jaka, ki nongrep, ki nongshong shnong, bad ki nongpyrshah ban iashim bynta, bad ha kaba la kynnoh ba la pyndonkam da ka bor haka rukom kaba pynduh ia ka jingshaniah jong ki paidbah, ka jinglong hok jong ka jingleh baroh kawei ka ieng ha ka jingma kaba khraw.
Ki khubor hadien ki pyni ba kane ka jingjia ka la paw da ka jinglehbor, ka jingshahkem ki sengbhalang bad ki Paidbah, ka jinglynthem maw iaki Paidbah, ki jingkhang surok, ka jingpyndonkam da ki lyer pynbthei, lyer pynsat khmat, bad ki jingjia thombor kynthup ïa ka jingpynjot ïa ki kali, bad ka jingtih ia u surok PWD daki nongkyrshah ka Shree cement, kine baroh ki khot ïa ka jingbishar bniah kaba khlem liang da ki bor ba dei peit shwa ban shim ïa kano kano ka sienjam kaba kham bniah halor ka nongrim jong kato ka 31 tarik u July 2026.
Ha kine ki jinglong jingman, ka jingdawa ban pyndam ne pynduh noh ia kata ka public hearing ba la kdew kam dei kaba khlem nongrim; hynrei, ka long kaba donkam bha na ka bynta ka jingmyntoi jong ka jinglong hok ha ka rukom treikam, ka jinglong hok ban pynneh pynsah iaka hok u Paidbah bad ka mariang, ka jingshaniah jong ki paidbah, bad ka jingiada ia ki hok synshar paidbah ha ka jaka jong ka Sixth Schedule.
Kumta ka sorkar Meghalaya, ka Meghalaya State Pollution Control Board, bad ki bor synshar district jong ka East Jaiñtia Hills ki dei ban leh kyrkieh, kataban:
- Pynduh noh ia ka public hearing kaba la long ha ka 31 tarik u July 2026.
- Hukum ban tohkit laitluid halor ki jingkynnoh ba don ka jingkhanglad, ka jingleh donbor, bad ka jingpyndonkam bor kaba iadei bad ka hearing.
- Pynthikna ba ym don kano kano ka sienjam kaba pynbor ne kaba pynshitom bein pyrshah ia ki nongshong shnong bad ki sengbhalang, kiba pynmih ia ki jingpyrshah katkum ka ain.
- Pynthikna ba kano kano ka jingïamir jingmut paidbah haka lashai yn pynlong katkum ka aiñ, da ka jingkhuid kaba pura, kaba shngain, bad kaba ïaryngkat na ka bynta baroh ki nongshim bynta kiba shah ktah.
Kane ka kam kadei tang ia kawei ka hearing, ym dei ban iaid lait bad ka jing iadei bad ka jinglong ba janai jong ka jingshim rai halor ka mariang, ka hok jong ki trai ri trai muluk bad ki nongshong shnong, bad ka jingkitkhlieh jong ka Jylla ka dei ban long kaba pawshai ba ka long pdeng ha kano kano ka jingpyntreikam kaba ktah ia ka khyndew ka shyiap, ka hok Jong u Paidbah, ka jingpynneh mariang, bad ka jingshaniah hi jong ki paidbah.
Ka jubab kaba kloi bad kaba hok na ka Sorkar hapoh ka por ba la buh ia ka ultimatum ka long kaba donkam bad kyrkieh bha ban iada na ka jingkulmar kaba kham jur bad ban pynphai biang ia ka jingshaniah ha ka synshar ain bad ka jinglong hok khamtam ha kaba iadei bad ka hok Jong u Paidbah.