Ki khynnah skul jong ka Chankylliang Evergreen School Mooshrot, West Jaintia Hills District mynta ka sngi ki la pynlong ia ka jingpynsngewthuh paidbah ha ka shnong Mooshrot ban pynsaphriang ia ka jingpynsngewthuh shaphang ki jingsniew kiba lah ban mih na ka jingdih duma.
Ia kane ka rally la pynlong da ka skul hapoh ka jingialam jong ki nonghikai. Ki samla pule ki la rah ia ki placard kiba don ki jingthoh bad ki khubor bad ki la iaid lyngba ki jaka bapher bapher ban pynsngewthuh bad pynshlur ia ki briew ban iehnoh ia ki jingdih duma.
U Headmaster jong katei ka skul, u Sanladky Lyngdoh u la pynpaw ba ïa kane ka rally la pynlong ban pynsngewthuh shaphang ki jingktah kiba sniew jong u duma bad ban ïarap ïa ki briew ban sngewthuh ïa ka jingma kaba wanrah ïa ka koit ka khiah bad ka jingbha jingmiat ha ka longïing longsem. U la kyntu ia baroh ban kiar na u duma na ka bynta ka jingim kaba koit ba khiah bad kaba bha.
