Ki dkhot jong ka Khasi Students’ Union (KSU), South West Border Circle, ha ka 30 tarik Jylliew 2026, ki la ïoh ban bat ïa uwei u briew ba la suba jur ba dei u mynder na Bangladesh uba la wan ban rung be-aiñ sha India lyngba ki ne ki thaiñ la katto katte bnai da ka ba sah ha ki thaiñ Ladrymbai bad Silchar Assam. La ioh bat ïa une u mynder ha ki bynta ka Surok Borghat -Sonapyrdi da ka ba wan na ka liang Sonarpyrdi ban leit sha ka liang Borghat.
Hadien ba la bat ïa u, ki shipai BSF ki la wan ban shimti ïa utei u mynder bad ban aiti sha ki Pulit kiba dei peit khnang ba yn leh ïa kaba donkam katkum ki kyndon jong ka aiñ.
Katkum ka jingphla kaba nyngkong jong utei u mynder, u la ong ba u wan sha kine ki thaiñ ban trei kum u mistari bad u la pynithuh thok ïalade ba u dei na Assam. U la ïathuh ruh ba u don ki paralok kiba trei lypa kum ki mistari ha ki shnong khappud. Hynrei, hadien ba la tohkit bniah ïa u, la lap ba u dei u nong Bangladesh uba la sah be-aiñ hapoh ka ri India. U la ïathuh ruh ba mynta u thmu ban leit phai biang sha Bangladesh.
Ha ka jingtohkit kaba kham bniah, la ïoh ruh ïa ka jingphla kaba kdew ba don uwei u briew uba la tip kyrteng kum u Ali Ahmed Laskar, uba ju khot ruh da ka kyrteng Gulshan, uba shong die dukan ha Tongseng, Narpuh. Ha kawei pat ka bynta jong ka jingphla, utei u mynder u la ong ba utei u briew u don ruh kawei ka hotel ha Lad Rymbai bad u dei uba ju trei kum u dalal ban pynbeit bad ban lam lynti ïa ki nong Bangladesh ban rung tuh shapoh ka ri India.
Ka Seng ka sngew ba kane ka jingjia ka pyni shai ba lah ban don bun ngut ki dalal kiba la don lypa hapoh India kiba ju pynbeit, jingïarap bad ïalam lynti ïa ki nong Bangladesh ban rung be-aiñ sha ka jylla bad sha ka ri da kaba pyndonkam ïa ka kam mistri kum ka jingïada bad ka lad ban pynthame ïa ki paidbah bad ki bor ba dei peit.
Ka Khasi Students’ Union, South West Border Circle, ka pynpaw ïa ka jingsngewkhia kaba jur halor ka jingkiew jong ka jingwan rung be-aiñ ki mynder ri bad ki bar jylla sha ka Ri Khasi bad sha ka jylla Meghalaya. Kane ka long ka jingma kaba khraw ym tang ïa ka jingshngaiñ jong ka jylla hynrei ruh ïa ka jingim bad ka jingïoh jingïada jong ka jaitbynriew trai ri trai muluk.
Halor kane, ka Seng ka kyntu jur ïa ki bor Pulit ba kin kem mardor ïa utei u Gulshan, uba la kynnoh ba u long u dalal bad ban pynlong ïa ka jingtohkit kaba bniah ban lap ïa baroh kiba donkti ha kane ka kam. Ka Seng ka ngeit ba lada ka jingtohkit ka long kaba khuid bad kaba bniah, yn lah ban lap ruh ïa kiwei pat ki dalal bad ki kynhun kiba ju pynrung tuh ïa ki nong Bangladesh shapoh ka ri India.
Ka Seng ka maham jur ruh ïa kino kino ki briew kiba ju ïada, pynsah, pynrieh lane ai jingïarap ïa ki mynder kiba rung be-aiñ shapoh ka jylla. Ka Seng ka pynpaw shai ba kan ym shong kli kti hynrei kan leh da kaba tyngeh pyrshah ïa kino kino kiba don bynta ha kine ki kam be-aiñ.
Ha kine ki sngi ban wan, na ka liang ka KSU South West Border Circle kan pynjur ïa ki jingkhynra ha ki shnong bapher bapher, khamtam ha ki thaiñ khappud, ban lap ïa kino kino ki bar jylla ne ki mynder kiba trei kum ki mistri bad ki wei ki wei ki kam hynrei kim don satia ïa ki kot ki sla kiba biang katkum ki kyndon jong ka aiñ. Lada lap ba ki don bynta ha ka jingïarap, jingïalam lynti ne jingïoh bynta ban pynrung tuh ïa ki nong Bangladesh shapoh ka ri India, ka Seng kan leh da kaba tyngeh bad kan aiti ïa ki sha ki bor ba dei peit ban leh katkum ka aiñ.
Shuh shuh, ka Seng ka kyntu ïa baroh ki paidbah, ki Rangbah Shnong, ki Dorbar Shnong ba kin ïatreilang bad long kiba peitngor. Lada don kano kano ka jingsuba halor ki briew kiba sah ne trei be-aiñ, dei ban pyntip mardor sha ki bor shnong, ki Pulit lane sha ka KSU khnang ba yn lah ban tehlakam ïa kane ka jingma kaba nang jur.
“Ka jingshngain jong ka Ri bad ka jingïada ïa ka jaitbynriew kam dei tang ka kam jong ki bor synshar, hynrei ka dei ka jingïatreilang jong u paidbah baroh.” la pynkut ka kyrwoh na ka KSU.