Ka Khasi Student Union ka la ioh ia ki nongkitkam ba thymmai na ka bynta ka samoi treikam jong u snem 2026 -2029 .
Ka Khasi Students’ Union (KSU) Central Body ka la pynbna ia ki nongkitkam ba thymmai jong katei ka seng na ka bynta ka samoi treikam jong u snem 2026 haduh 2029 .
Katkum ka result ba la pynbna da ka elekshon komiti jong ka KSU , u Bah Raymond Kharjana u la shah jied khlem don ba ïaleh pyrshah kum u President ba thymmai jong ka KSU Central Body bud sa u Bah Pynkmenlang Sanmiet u la shah jied khlem don ba ialeh pyrshah kum u Vice President, katba u Bah Reuben A. Najiar u la shah jied khlem don ba ialeh pyrshah kum u General Secretary.
Ka KSU Central Body, kaba la ïalam da u bah Lambokstarwell Marngar kum u President bad u bah Donald V. Thabah kum u General Secretary, ki la pynkut noh ïa ka samoi treikam jong ka Central Executive Council (CEC) 2023–2026 bad pynïaid ïa ka rukom jied ïa ki nongïalam ba thymmai.
U General Secretary ba la mih noh u bah Donald V. Thabah u la pyntip ba ka KSU mynta ka don kumba 480 tylli ki unit bad palat 10,000 ngut ki dkhot kiba trei shitom.
Ha ka jingiakhun ia ka kam Assistant General Secretary, u Bah Pynshaiborlang Rani u la jop da 2,883 vote, katba u Bah Melajied Khongbuh u la ioh 1,722 vote.
Na ka bynta ka kam Organizing Secretary, u Bah Cleenstar Shabong u la mih kum u nongjop da kaba ïoh 1,905 vote, bud sa u Bah Hopefullborn Mawnai uba la ïoh 1,594 vote, u Bah Nangrikupar Malngiang uba la ïoh 682 vote bad u Bah Samuel Shabong uba la ïoh 410 vote.
Ha kane ka elekshon ban long u Education Secretary, u Bah Alerick Kharjana u la jop da 1,850 vote. Kiwei pat ki kyrtong ki kynthup ia u Bah Robbinestar Nongrem uba la ioh 1000 vote, u Bah Andrew Gary Dkhar uba la ioh 845 vote, u Bah Nangshngainbha Lakiang uba la ioh 575 vote bad u Bah Samuel L. Nonglait uba la ioh 329 vote.
Na ka bynta ka kam Information & Publicity Secretary, u Bah Pynshai Kupar M. Dkhar u la jop da 1,416 vote, bud sa u Bah Sandy Sohtun da 994 vote, u Bah Michael Mawa da 976 vote, u Bah Jeremiah Pohthmi da 687 vote bad u Bah Shelkitbok Kharbani da 63 vote.
Ha ka kam Office Secretary u Bah Gary R. Mawlieh u la jop da 1,700 vote, katba u Sports & Cultural Secretary u Bah Eric Anthony Nongkynrih u la jop da 2,596 vote.
Na ka bynta ka kam Environment Secretary, u Bah Shiningstar Kharbihkhiew u la jop da kaba ioh 1,571 vote.
Ia ki nongialam ba la thymmai jong ka KSU CEC 2026-2029 la pynbna da u Chairman ka elekshon komiti u Bah Danny M. Khyriem bad u Secretary ka komiti elekshon u bah Samuel B. Jyrwa.