Ka Jaiñtia National Council (JNC) ka pynpaw ka jingïaroh kaba khraw ïa ki Pulit ka Ladrymbai Outpost bad ia ka ophis u SP jong ka East Jaiñtia Hills District kiba la leh kloi bad treikam bha ban wad bad pyllait im ïa kawei ka samla kynthei na ka shnong Wapung Chnong kaba la jah rngai ha ka nongbah Ahmedabad, Gujarat, naduh ka 15 tarik March, 2026.
Kane ka jingjia ka la paw pyrthei hadien ba ka JNC ka la ioh ia ka jingtip na ka kmie jong katei ka kynthei kaba la jah. Da ka jingsngewkhia, ka JNC ka la ujor da ka First Information Report (FIR) ha ka 19 tarik ha Ladrymbai Police Outpost. Bad da ka jingtrei shitom jong ka kynhun pulit jong ka thaiñ, hapoh ka jingïalam jong u Superintendent of Police, East Jaiñtia Hills, la lah ban lap ïa kane ka samla bad mynta ka la poisuk ha lynti ban leit phai noh sha la ïing.
Ka JNC ka ai ka jingsngewnguh kaba khraw ïa ki bor pulit kiba la trei khlem shongthait bad pynpaw ruh ïa ka jingkhublei kaba kyrpang ïa ka Kong Santa Mary Shylla, MLA ka 5-Sutnga Saipung Constituency, kaba la shimkhia ban ïarap ha kane ka jingjia.
Hynrei ka JNC ka pynskhem ba kane ka jingjia kaba sngewsih ka dei ka jingmih na ka jingbym shimkhia jong ka Sorkar Jylla ïa ki mat ai kam ai jam ïa ki samla ha Rilum Jaiñtia. Namar ka jingbym don ki lad kamai bad ki polisi treikam hapoh ka jylla, bun ki samla ki hap ban mih na la ïing ban wad kam shabar, bunsien ki ngop ha ki jingtyrwa kam ki bym shngaiñ ne kiba ialam bakla pynban ia ki.
U bah Nangjan Dkhar uba dei u Vice President ka JNC (CEC) u la ong ba “Ka Sorkar kam ju shimkhia ia ka jingiohkam jong ki samla jong ngi. Lada ki polisi treikam ki biang bad ki rukom buh kyrpang ki don, ki samla jong ngi kin ym donkam ban leit wad kam sha bar na ka jylla bad kin ym ïakynduh ïa kum kine ki jingma. Kane ka jingjia ka long ka jingpynkynmaw kaba shai ba ka sorkar jong ngi ka dei ban shim khia bha ïa ki samla jong ngi.”
Shuh shuh u la kyntu ïa baroh ki samla na East Jaiñtia Hills ba ki dei ban husiar shwa ban pdiang ïa kino kino ki kam shabar ka jylla. “Pynshisha bha ïa ki jingtip ba bniah jong ka kam, kiar na ka jingshah ialam bakla ha ki jingkular ba lamler bad dei ban iasngewthuh jingmut bad ka ïing ka sem jong phi,”. U La kyntu ruh ïa ki kmie ki kpa ban long kiba husiar bad ban ïalam ïa ki khun ha kaba shim ïa ki rai kiba bniah halor ka iohkam iohjam.
Ka JNC ka la pynpaw biang ba hapoh ka “Save Jaiñtia Mission” kaba la pynbna Paidbah ha u snem 2024, ka la ai san tylli ki jingdawa ba kongsan sha ka Sorkar, kawei na kine ka long ka jingkhot ban thaw ïa ka “Policy ban pynthikna ïa ka jingbuh kyrpang ïaka bhah thungkam thungjam haki karkhana na ka bynta ki samla trai ri”. Ka Council ka la pynskhem biang ba lada la burom ia kane ka jingdawa, lah ban khanglad ia ki jingjia kiba kum kine.
“Mynta ka la dei ka por ïa ka Sorkar ban pyndep ïa ki jingdawa jong ngi bad ban pynskhem ïa ka lawei jong ki samla jong ngi, khnang ba kum kine ki jingjia ba sngewsih kin ym jia shuh,” pynkut u bah Dkhar.