U District Magistrate ka West Jaiñtia Hills ula pynmih ïa ka hukum katkum ka kyndon 223 jong ka Bharatiya Nyaya Sanhita (BNS) kaba khang pyrshah ïa ka jingdie bad sam ïa ka petrol bad diesel ha ki klong bilor ne ki jerry can hapoh u pud u sam jong ka West Jaiñtia Hills bad kane kan treikam noh mardor tad haduh ban da pynbna da kumwei pat ka hukum.
Ïa kane ka hukum la pynmih hadien ka jingïaid paidbah ba la pynlong da ka Khasi Student Union (KSU) hynnin ka sngi bad ka jinglong jingman mynta ruh kam pat long kaba shngaiñ na ki jingïakhih.
Kumta u District Magistrate ula pynmih ïa kane ka hukum na ka bynta ka jingbit jingbiang jong ki paidbah bad ban ïada na kano kano ki jingjia.
Kino kino kiba dei umphniang petrol bad diesel ha ki jerry can ne ki bilor khlem da ïoh jingbit kaba biang ki lah ban shah pynshitom hapoh ka kyndon aiñ Section 223 jong ka Bharatiya Nyaya Sanhita (BNS) bad kiwei kiwei ki kyndon aiñ kiba ïadei bad kane.
Hynrei ka jingai umphniang diesel na ka bynta ki mobile tower bad ki kompeni shna surok kan dang ïai bteng katkum ki standing order ba la pynmih da u District Magistrate, da kaba bud ryntih ïa ka aiñ Petroleum Act, 1934.