Mynta ka sngi ka Meghalaya Peoples United Front (MPUF), East Jaiñtia Hills District, ryngkat bad ka Federation of Khasi Jaiñtia Garo People (FKJGP), Khliehriat Circle ki la aiti ïa ka dorkhas sha u Executive Engineer, MeECL, Mowakhu, East Jaiñtia Hills District, ha kaba iadei bad ka jingkiew dor palat ka bai bording, ban pynioh biang ia ki jingpyniasoh bording ba la pynduh bad ban pynbun ia ki nongtrei hapoh katei ka ophis.
Ia kane ka kynhun la ialam da u President ka MPUF, East Jaintia Hills District u bah Kyrshan Blah, u President ka FKJGP Khliehriat Circle u bah Michal Chyrmang, u Secretary ka MPUF u Prakash Shylla, bad kiwei kiwei ki dkhot na baroh ar tylli ki seng.
Haba kren ha ki lad pathai khubor, u President ka MPUF u Kyrshan Blah u la ong ba bun ki shnong ki la ujor halor ka jingkiew kynsan ka bai bording bad ba bun ki longïing ki la shah pynduh bording. U la bynrap ruh ba haba ki transformer ne ki tiar ki sniew, ki nongshong shnong kiba iakynduh ia ka ophis bad la iathuh ba ka ophis ka duna palat ia ki nongtrei. Kine ki lai tylli ki mat ki long ki mat ba kongsan ha kane ka dorkhas. Ki sengbhalang ki la ai por shibnai ia ka sorkar bad ia ka MeECL ban pynbeit ia kine ki jingeh.
U Blah u la kyntu ia ki nongshong shnong kiba shah ktah ban kyrshan ia ki sengbhalang, lada ki sdang ia ka jingiakhih ha ka jingiadei bad kane ka jingeh. U la ong ruh ba lada ka sorkar ka lah ban siew ia ki pisa kiba bun kiba dang sahteng sha ka tnad ka kit ka bah lane kiba don kali, ka dei ban lah ruh kumjuh ban pynbeit ia ki jingsiew jong ki longiing ki bym lah ban siew ia ka bai bording jong ki. U la kynnoh ba don ki nongsam bai bording ba ia ki meter ki khein hi dalade ia ki bill ha ki iing bad ba ki nongtrei ophis ki don bynta lang na ka bynta ka jingkhein bill kaba bakla, da kaba kynnoh ba ka jingkhein bill ka sah kumjuh la ka long ba la ai bording shisha ne em.
Ha kajuh ka por, u President ka FKJGP Khliehriat Circle u Michal Chyrmang u la ong ba ki longïing kiba rit kiba pyndonkam duna ïa ka bording teng teng ki ju shim dor kumjuh lane kham bun ban ïa ki iing kiba kham heh kiba pyndonkam ïa ki Geyser, Heater, bad kiwei kiwei ki tiar. U la ai jingmut ba ka tnad kan pynlong ia ki prokram pynsngewthuh paidbah kiba batai kumno ban khein ia ka bai bording khnang ba ki paidbah kin ym kynnoh bakla ia ka tnad ba ka shim dor palat. U la dawa ruh ba ki nongsam bai bording ki dei ban pyni ha kawei pa kawei ka longïing ïa ka jingkheiñ meter haba ai bill.
U Michal u la bynrap ruh ba bun ki meter mynta ki pyndonkam da ki LED display bad donkam bording ban pyni ia ki jingpule. U la kynthoh ba u nongsam khein bill um lah ban pynkhreh ia ka bill kaba thikna lada u meter um don bording bad ka jingpyni jong u ka long kaba thylli; hynrei teng teng la pynbeit ia ki bill khlem da peit da kaba paw ha ki meter.
