Ka Press Information Bureau (PIB), Shillong, ha ka jingiatreilang bad ki bor District ka West Jaintia Hills bad ka Jaintia Journalists’ Association (JJA), ki la pynlong ia ka Media Work Shop halor ka phang “Ka Viksit Bharat: Guarantee for Rozgar and Ajeevika Mission (Gramin) VB GRAMG bad kiwei kiwei de ki Central Scheme, hynne ka sngi 30/03/2026 ha D.C. Office Conference Room, Jowai.
Ka kong B.Blah, MCS, Additional Deputy Commissioner haba kren ha kane ka sngi, ka ong ba ki paidbah kim dei ban sngew phylla ia ka jingtrei shispah sngi bad ka jingpynkylla ia ka kyrteng na ka Mahatma Gandhi National Rural Employment Gaurantee Act (MGNREGA) sha ka VB GRAMG ka dei ka jingpynsuk ka rukom treikam bad ka jingiohnong ia ka Jylla bad ia ki paidbah nongshong shnong jong ka.
Ba ki paidbah nongshong shnong kin nangioh jingshai shuh shuh halor kane ka VB GRAMG (Act 2025) la aiti ha ka Block Office ban nangpynshai shuh shuh ia ki paidbah ha ryngkat ki pamphlet (kot lyngkdop) ki ban sam sha ki paidbah.
Kane ka scheme VB GRAMG, ka dei ka scheme kaba la pyniaid da ka sorkar kmie (India) lyngba ka sorkar Jylla.
Ha kane ka jingialang la wan ia shim bynta da ki Rangbah Shnong, ki Nongrep bad ki Nongpathai khubor.
