Ka Joint Action Committee (JAC) jong ka East Jaiñtia Hills Truck Owners Transport Association bad ka Jaiñtia Hills Truck Owners Association kala pynlong ïa ka jingïalang ha Tuberkmaishnong Tahkhniang ban ïakren halor ki jingeh kiba dang ïaid shakhmat, kynthup ruh ïa ka jingkhang ïa ki Bulker truck.
U Secretary ka JAC, u Kyrshan Dkhar, ula pynbna ba ka Committee kan sdang ïa ka jingïakhih (strike) pyrshah ïa ki kali kiba leit kit mar (load) na ki kharkhana pynmih dewbilat kum na ka Star Cement bad Dalmia Cement, kumjuh ruh ïa ki truck kiba leit sha Byrnihat. Kane ka sienjam ka wan hadien ka shithi bala phah ha ka 16 tarik Ïaïong kaba la phah copy ruh sha ki bor synshar distrik.
Ka jingïakhih kan sdang naduh ka por 10:00 baje mynstep ha ka 24 tarik Ïaïong, ban ym shah shuh ïa kino kino ki truck ban load na ki company cement. Ka JAC kala ong ruh ba kan ym leit jingïashim bynta ha kino kino ki jingïalang kiba pynlong ha ki jaka bala buh da ki company, ha ka jingiadei bad kane la kyntu ruh ïa ki transporter ha Lumshnong ban ai jingïatreilang bad ka JAC.
Halor ka mat jong ki Bulker truck, ka JAC kala pynskhem biang ïa ka jingïapyrshah bad kala khot ïa ka jingïatylli hapdeng ki dkhot, da kaba ong ba kan peitngor ïa ka jingïaid beit jong kane ka jingiakhih ba kan long kaba iaid beit. Ka la kyntait ruh ïa ki jingkam jong ka Jaiñtia Hills Cement Manufacturers Association (JHCMA), kaba ïada ïa ka jingpyndonkam bulker, da kaba ong ba dei tang ka jingpyrshang ban lait na ka rukom treikam jong ki Association.