Ka Kong Saralinda Kharlukhi, Secretary bad kaba dei kawei na ki nongkitkam jong ka Meghalaya Fair Price Shop Dealers Association ka la pynpaw ia ka jingsngew lyngoh hadien ba ka pisa kaba haduh 39 klur tam naduh 2016 kaba dei ka Subsidy na ka bynta ki nongioh jingmyntoi haba iadei bad ka jingsam khaw rashon ha ka jylla kam pat poi satia naduh u snem 2016.
Haba kren sha ki lad pathai khubor na ka liang ka Kong Saralinda Kharlukhi ka la ong ba ka la iakynduh bad pynsngew ruh ha u Secretary ka All India Fair Price Shop Dealer Federation ha Kolkata ha kaba ka la pynpaw ba ka Subsidy kaba ki nongsam khaw ka jylla ki dei ban ioh naduh u snem 2016 ka la poi sha ka 39 klur 80 lakh 21 hajar lai spah lai phew lai tyngka.
Kumta na ka liang ka Kong Saralinda Kharlukhi ka la phah ruh da ka jingthoh sha u Under Secretary Food Civil Supply jong ka Sorkar jylla bad kumjuh ruh sha u Joint Secretary Department of Food & Public Distribution jong ka Sorkar Pdeng ban shimkhia mardor haba iadei bad ka jingsahkut ka bhah pisa na ka bynta ki nongsam khaw rashon ka jylla.
Khatduh ka la kyntu ia ka Sorkar ba kan shimkhia mardor ia kane khnang ba kan long ka jingmyntoi ia ki nongsam khaw rashon ka jylla bad ka la pyntip ruh ba kan iai buddien biang ia kane ka kam bad ka kyntu ia ka Sorkar ba kan pyllait noh ia kane ka bhah Subsidy na ka bynta ki nongsam khaw rashon ka jylla.