Ki katto katne ki Dkhot jong ka UDP hapoh ka jingïalam u ma Pyndaplang Muskor na ka shnong Iooksi Umdeinlin uba bat kum u Vice President ka UDP jong ka 4-Mowkaiaw Constituency, hynnin ka sngi kila leit ban pynïasoh sha ka National People Party (NPP) haka jingïalang bala pynlong ha Highwind Lakeside Restaurant hajan ka pung Thadlaskeiñ West Jaiñtia Hills District.
Ha kane ka sngi la ïadonlang da u National General Secretary ma Sniawbhalang Dhar, na ka liang u ma Pyndaplang Muskor ula pynsngew ba ka Party UDP mynta kala don hapdeng ka jingtlot bor shaba palat bad dei halor kane ka nongrim ula shim ïa ka rai ban phai khmat sha ka NPP kaba la wanrah shibun ki kam pynroi naduh ki surok, ki skul bad kiwei de bad kane kala pynlong ïa u ban rung sha kane ka kynhun seng saiñ hima kaba ïalam ïa ka sorkar MDA.
Shuh shuh ula ong nangne shakhmat ka jingïatreilang bad kane ka seng NPP yn sa lah ban wanrah khambun ki jingkylla haka roi ka par bad ula kular ruh ban trei shitom na ka bynta ban pyntylli ïa ka party bad ban pynkhlaiñ ïa ka jingtreikam.
Ula ong ki don ki samla kiba shah hikai haka jaka Training kaba u ai jinghikai kum ki nongbud jong u bad kila kloi ban pynïasoh ïalade sha kane ka party NPP, da kaba u buh ka jingkyntu lang ïa ki paidbah nongshong shnong ka jylla ba kin ai jingkyrshan ïa ka Dr. Ampareen Lyngdoh ha kane ka Election MP na ka Shillong Seat.