Ka Lehñiam Shad Tyllu bala pynlong shisien shisnem da ka Raij Mynsoo hashwa ban sdang ka jingleit hiar rep ki khun ka Raij sha ki hali ki pynthor, mynta ka sngi 1 tarik u ïaïong kila pynlong ïa kane ka lehñiam hapdeng ka jingshongkun.
Ha kane ka sngi la wan ban sakhi lang da u President ka Seiñraij Jowai u ma O.H. Toi kum u kongsan, haka jingdonlang u K. Myrchiang, Pa Doloi Elaka Mynso, ki waheh wasian ka ñiamtre na ki Raij ki Shnong bad ki nongïalam ka Raij Mynso nalor kiwei de.
Ïa ka jingïalang la pynïaid da u Habhijan War, President Seiñraij Mynso, ka jingkren na u P. Chen, Secretary Seiñraij Mynso kumjuh na u Waheh Chnong Mynso-A, katba la ïoh ka jingkren shaphang ka Nongrim jong ka Lehñiam Shad Tyllu da u Washington Shylla, Adviser Seiñraij Mynsoo.
U O.H. Toi, President Seiñraij Jowai haka jingkren kum u kongsan ula ai ka jingïaroh ïa ki khun ka ñiamtre hapoh ka shnong Mynsoo kaba la lah ban pynlong ïa kane ka prokram shisien shisnem kum ka dak ban pynpaw ïa ka jingriewspah ka Riti ka Dustur jong ka jaitbynriew.
Katba na ka liang u Raymon Nartiang, Pator Raij Jawai ula ai mynsiem ïa ki khun ka ñiamtre hapoh ka Shnong Mynso ba kin long kiba ïatylli bad ïatreilang kawei da ka jingïasngewthuh jingmut khnang ba yn lah ban pynneh pynsah ïa ka riti ka dustur na ka bynta ka pateng ban wan.
