Ka Hynñiewtrep Integrated Territorial Organisation (HITO) Seng kmie ka sngew donkam ban pynmih ïa kane ka Official Media Statement bad ban pynshai paidbah halor ki khubor kiba la saphriang ha ki lad pathai khubor bad social media, kiba kam ba ki nongïalam jong ka HITO Jaiñtia Hills Unit ki la ïehnoh kam. Ban ym don kano kano ka jingsngewthuh bakla, ka HITO ka kwah ban pynshai kumne.
Halor ka HITO Jaiñtia Hills Unit; ka HITO Jaiñtia Hills Unit la thaw tang na ka bynta ka samoi treikam kaba 6 (hynriew) bnai. Kane ka samoi kala kut noh katkum ka rai jong ka Central Executive Committee. Kumta, naduh ba la kut ka samoi treikam, ym don shuh mano mano kiba don ka bor lane ka jingmynjur ban mihkhmat ïa ka HITO Jaiñtia Hills Unit, bad kino kino kiba dang kam ïalade kum ki nongïalam ne ki dkhot ki leh ïa kata ha ka jinglong shimet jong ki.
Halor u Bah Deibormi Siangbood ka HITO ka pynshai paidbah ba u Bah Deibormi Siangbood um shym la long satia u President jong ka HITO Jowai Circle. Ka daw ka long ba ka HITO Jowai Circle ka la dep shah pynkut noh shuwa ban pynlong kano kano ka jingïalang ne election ban jied nongkitkam. Kumta, kano kano ka jingkam ba u dei u President barim jong ka HITO Jowai ka long kaba bakla bad kaba pynbakla ïa paidbah.
Halor u Bah Yoomiki Passah ka HITO ka pyntip paidbah ba la pynduh noh ïa ka jinglong dkhot jong u Bah Yoomiki Passah katkum ki kyndon bad ki rukom treikam jong ka seng. Naduh kane ka sngi, um don shuh kano kano ka jingithuh kum u dkhot ne u nongmihkhmat jong ka HITO.
Ka HITO ka pynpaw shai ba kino kino kiba dang kam ïalade kum ki nongïalam jong ka HITO Jaiñtia Hills kim dei ki nongmihkhmat ba la ithuh da ka seng bad ki jingkren ne ki jingleh jong ki kim dei satia ki rai ne ki jingkren jong ka HITO. Ka seng ka sngew ba kine ki jingleh ki thmu ban pynjah burom, ban pynkulmar jingmut ïa paidbah bad ban pynsniew dur ïa ka kyrteng jong ka HITO.
Ha kajuh ka por, ka HITO ka ai jingïaroh bad ka ai khublei ïa ka Ksehrynshang Circle bad Lakaseiñ kiba la pynpaw ïa ka jingsngewkhia jong ki sha ka Central Executive Committee. Ngi kwah ban pynshai ba ngim don kano kano ka jingïapher jingmut ne ka jingeh bad ki, bad ngi kyrmen ba kin ïai bteng ban trei na ka bynta ka bha ka miat jong ka imlang sahlang bad ka jingshakri ïa u paidbah.
Ka HITO ka kyntu ïa baroh ki paidbah, ki nongkyrshan ba kin shim tang ïa ki jingpynbna ba la pynmih da ka Central Executive Committee ne ki nongmihkhmat ba la ithuh da ka seng.
Kino kino ki jingkam kiba mih na ki briew kiba ym don shuh ka jingithuh ha ka seng ym dei ban kheiñ kum ka jingkren jong ka HITO. Ka HITO kan ïai neh skhem ha ka nongrim jong ka jinglong hok, ka jingshisha, ka jingkitkhlieh bad ka jingshakri paidbah, bad kan ïai bteng ban ïada ïa ka burom bad ka jingngeit paidbah haka seng. Kane ka long katkum ka kyrwoh na u Deibormi Rymbai CEC Members cum founder.