Ha kaba iadei bad ka khubor kaba mih ha kawei na ki ladpathai khubor, “Kha Ka Longkmie Da I Khun Hapoh Kali/Bym ioh iaid Na Ka Jingkhlong Surok Kiba Kyrshan Shree Cement” mynta ka sngi ka 31 tarik u Naitung, 2026 na ka liang ka Ophis jong u Deputy Commissioner, East Jaintia Hills District, Khliehriat ka la wad ia ka jingtip ba bniah lyngba jong i Block Medical & Health Officer, Saipung Block iba long ruh i Sr. Medical & Health Officer, Sutnga CHC bad la shem ba kane ka khubor kaba long ka bym iadei bad i Longkmie iba la tip kyrteng kum i Kong Riniwanki Sukhlain iba na ka shnong Shnongrim, East Jaintia Hills District i la kha ia ine i khyllung ha Sutnga CHC ha ka 31 tarik u Naitung, 2026 hapoh ka jingpeit jingkhmih jong ki Doctor kiba don ha katei ka jaka jingaisumar.
Itei I longkmie i la suhkha kumba 4:30 mynstep bad marmar ki la pyntip ia i ANM bad i ANM ruh i la leit sha iing jong i bad ban peit ia ka jinglong jingman jong itei I longkmie. Te kumta i ANM i la shim ka rai ban phah noh ia itei i longkmie sha Sutnga CHC. Ha ka por kumba 8:30 eiei mynstep ki la mih na la iing da ka kali ba la pynbiang na ka Chief Minister’s Safe Motherhood Scheme (CMSMS). Ki ap kumba 45 minit na ka daw ka jingjulor ka surok bad kumta u Waheh Shnong jong ka shnong Shnongrim u la pyntip noh ia u Waheh Shnong jong ka shnong Lelad bad ha ka por 9:15 mynstep ki la bteng ia ka jingleit sha Sutnga CHC da ka kali CMSMS ba la pynbiang da u Waheh Shnong ka shnong Lelad.
Ha ka por 10:15 mynstep ki la poi ha Sutnga CHC bad ha ka por 11:15 mynstep i Kong Riniwanki Sukhlain I la kha ia ki khun kynthei iba khia 2.96 kilo. Haduh mynta baroh arngut i kmie bad i khun ki ia biang bad ki don ha ka jingpeit jingkhmih jong ki Doctor bad ki Nurse hapoh katei ka CHC.