Ka ophis jong u Deputy Commissioner, East Jaintia Hills District lyngba u Additional Deputy Commissioner u bah A.Nongbri u la kren sha ki lad pathai khubor mynta ka sngi ha kaba ïadei bad ka jingpynsngewthuh paidbah halor ka Special Intensive Revision (SIR) kaba dei ka jinglum thup kyrteng ia ki nongthep vote na ka bynta ka 6th Khliehriat bad 5th Sutnga–Saipung assembly constituency. U bah Nongbri u la ong ba ka Election Commission of India ka la pynmih ia ka SIR ban pynthymmai ia ka thup jong ki nongthep vote: ban kynthup lang ia baroh kiba dei hok bad weng noh ia ki bym dei hok.
Ka bynta jong ka ophis ka la sdang naduh ka 20 tarik u bnai June bad kan bteng haduh ka 29 tarik u bnai June; kane ka kynthup ia ka jinghikai ia ki ophisar kiba don ha ka kyrdan jong ka (BLO), ki booth agent , ki seng sain pyrthei, bad ka jingpynbeit ia ki form kiba donkam.
Ka field phase, ha kaba ki BLO kin leit jngoh ia man la kawei pa kawei ka longiing ha ki ar tylli ki konstitwensi, kan sdang ha ka 30 tarik u bnai June bad kan kut ha ka 29 tarik u bnai July 2026. Ha kawei pa kawei ka longiing ki BLO kin sam ar tylli ki enumeration form sha uwei pa uwei u nongthep vote; ki nongthep vote ki dei ban pyndap ia ki jingtip jong ki bad pyndait ia ka dur passport. Kawei ka form ba la pyndap ka sah bad u nongthep vote bad kawei pat la bat da u BLO, uban aiti ia ki form sha ophis ban pynkhreh ia ka draft electoral roll. Ka thup nongthep vote kaba khatduh eh kaba dang pyndonkam mynta ka dei naduh u bnai October 2025.
Lada ka kyrteng jong u briew kam paw ha ka thup nongthep vote ba la shna (ban pynmih hadien ka 5 tarik u bnai August 2026), ki lah ban ïakynduh ïa ki BLO bad ujor ïa ka jingdawa ne jingpyrshah, ka por jingdawa kaba shibnai kaba sdang naduh ka 5 tarik u bnai August 2026. Ia ka thup kyrteng thep vote ba khatduh yn pynmih ha ka 7 tarik u bnai October 2026. U bah Nongbri u la kyntu ia ki nongthep vote ba ki dei ban pynkhreh ia ki kot ki sla jong ki; ka ECI ka pdiang ia ki 11 jait ki kot ki sla bad ka ailad ia u Aadhaar kum kawei pat ka lad na ka bynta ki kot ki sla.
Ki kot ki sla kiba lah ban pdiang ki kynthup ia ka bank passbook, ka LIC, ka kot sngi kha (la kyntu ia kito ki bym don kot sngi kha ban apply noh kham kloi), ka passport, ka kot ba pynshisha ia ka jakasah ba pura, ka ST, bad kiwei kiwei ki kot pynshisha ba la ithuh. U la kyrpad ia ki khlieh nongsynshar ban iatreilang da kaba pynlong ia ki jingialang shnong bad ki BLO bad u la kyrpad ia ki nongmihkhmat, ki seng treimon sngewbha, ki seng niam, bad ki SHG ban iarap ban pynlong ia ka SIR 2026 kaba shai bad kaba thikna.